O le fetalaiga a Iesu ae le’i maliu ile lagi “Ia outou Fealofani”. O le autu lena o le mafutaga ole Eseta a le ekalesia i St Pauls Otara. ‘Ia outou fealofani ma femulumuliai’.

O le faamoemoe, ia avea vaitau ole Vaiaso Paia e mafuta faatasi ai, ma tomanatu i puapuaga ma le maliu tiga o lo tatou Alii Faaola faapea lona toetu manumalo. Ia faamasani i le femulumulua’i ma fetausia’i, ae silisili ai le fefa’amagaloa’i aua na muai faataitai e Iesu i luga o le satauro ina ua ia alaga; “Lou Tama e, ia e faamagalo atu ia te’i latou, aua ua latou le iloa le mea ua latou faia”. O afuaga ia o mafutaga fealofani ma le felagolagoma’i, ina ua mafuta o se aiga e tasi, tasi le loto, tasi le agaga, fefaasoa’i ma fefaamagaloa’i.

Na tatala aloaia le mafutaga ile 7 ile afiafi i le sauniga Alalafaga, na taitaia e le Tamā ole Matagaluega Rev Faleatua ma le tupulaga laiti.

Na sosoo ma le taumafataga ma ata tifaga a le fanau. O le aso Faraile, ole aso ole anapogi ma le aoga Tusi Paia faapea le campfire ile po. O le Aso Toonai, na faataua le soifua maloloina ile polokalame faamalositino ole steps, ona taape ai lea i vaega e tolu mo faaevagelia ma pese, mo le faaliga ile afiafi o le Aso Sa. O le Aso Sa o le lotu ole Toetu, na faatino ai faaevagelia ma pese. A ole afiafi na fai ai le faaliga o faaevagelia, sa tapenaina ile tasi le itula ile Aso Toonai. Na maitauina ai le sosia o taleni a le autalavou ae sili ai le autalavou laiti ma le aoga aso Sa. O le Aso

Gafua, ole aso o taaloga ma le BBQ na fiafia faatasi ai, ona lululima lea ma faatofa.

Faafetai ai ma viia le Alii aua e ui ose polokalame tele, aemaise ole gasesega o mea taumafa, ae lei lagona le vaivai aua na auga i le Atua loto ma agaga ole autalavou. O le faanaunauga, o sina a’u ipuvai e asu, o sina galuega ititi ou te faia, faia mo le Alii e ala i le auauna atu, ae le ole faatalitali e auauna mai isi mo i tatou.