Ko e ngaahi tu’utu’uni eni ke fakakakato ‘e ha taha ‘oku teu folau ki Tonga, ke fakahoko ia kimu’a he taimi folau.

• Oku fiema’u ke kakato e huhu malu’i ‘a kinautolu ta’u 12 ki ‘olunga kimu’a pea nau folau ki Tonga. Ko e angamaheni ‘oku ‘i ai e ngaahi tu’utu’uni folau ‘a e takitaha fonua. Ko Fisi mo Ha’amoa ‘oku na kei ‘eke pe e huhu malu’i hangē ko Tonga (huhu ‘uluaki mo hoani).
• ‘Oku lelei ange ke ‘ai ha malu’i ho’o folau (travel insurance) ‘o kapau ko ha tokotaha muli koe ‘oku ke teu folau ki Tonga, ‘E ala fakatau e malu’i ko eni ‘i ho’o fakatau ho’o tikite. ‘Oku pau ke ‘omai mo ha fakamo’oni pe ha tatau ki he email travel@health.gov.to ,‘i ha houa ‘e 48 kimu’a ho’o folau, ha tohi ke fakapapau’i kuo puka hao hōtele pe nofo’anga ‘i Tonga pea to e fakaha eni 'i ho’o taimi check in.

(Ko e fiema’u pe eni ia ‘oku angamaheni ma’ae kau folau ‘eve’eva ke malu’i kinautolu telia ha’anau puke he KOVITI-19 lolotonga ‘enau ‘i Tonga. ‘Oku ‘i ai pe e ngaahi me’a pau ke fakapapau’i ‘oku fakakau hono malu’i ‘o kapau kuo ‘osi ‘i ai ha’o malu’i folau ka ‘oku mahu’inga ke fakakau ai e malu’i ‘o ka ke puke he KOVITI-19.

Ko e fale’i lelei eni pea mo e founga ketau tokangaekina ha fiema’u ‘oku ‘ikai ‘amanekina pe hoko fakafokifa. ‘Oku lelei ange pe ‘a e mateuteu.)

• ‘Oku fiema’u ha setifikeiti pe kaati huhu malu’i mei he ma’u mafai ke fakahā he taimi check in. ‘Oku fiema’u e kau folau hono kotoa ke email e tatau ‘o e setifikeiti pe kaati huhu malu’i ko eni ki he travel@health.gov.to ‘i ha houa ‘e 48 pe lahi ange kimu’a e folau.
• Kuopau ke fakahā ho’o setifikeiti pe kaati huhu malu’i ‘i he check-in pea ‘i Tonga ‘o ka fiema’u ke sio ki ai. ‘Oku tali lelei pe mo e tatau he telefoni pe ngaahi naunau faka’ilekutolonika ‘o kau ai e ‘imeili.

Ko e kau pāsese ‘oku nau pehē ‘oku ‘i ai e makatu’unga fakafaito’o pau ‘oku ‘ikai ke lava ai kenau fakakakato e fiema’u huhu malu’i, ‘e fiema’u ha tohi fakamo’oni mei ha toketā ma’u mafai kuo lesisita ‘o fakahā ai e ngaahi ‘uhinga fakafaito'o ke faka’atā ai e tokotaha ni mei he tu’utu’uni ko ia.

‘Oku ‘i he potungāue ‘a e mafai ke ‘oua ‘e tali ke heka he vakapuna ha pāsese pe ta’ofi ke tū’uta ‘i he kelekele ‘o Tonga ‘o kapau ‘oku ‘ikai ke fiemalie e kau ngāue ki he lipooti faka-toketā ‘oku tuku atu.

‘Oku mahu’inga ke mahino ‘a e fiema’u koe ke ke huhu malu’i kakato ‘a ia ko e huhu ‘uluaki mo e hoani ka ‘oku ‘i ai e ni’ihi ‘oku ‘i ai e makatu’unga fakafaito’o ‘e ‘ikai lava ai kenau huhu malu’i pea ‘oku tuku atu pe e founga ke vakai ai na’a kei lava pe ho’o folau.

Ko e tali mo e ta’etali ‘e toki tuku atu ia. ‘Oku hāhāmolofia ha tu’utu’uni pehē ni ka kuo ‘osi ‘i ai pe ‘a e founga ‘o kapau ko e ‘uhinga fakafaito’o.