‘Oku kei mahu’inga ‘aupito ‘a hono tanumaki ‘o e kau faifekau

Ko e taha e me’a ‘oku tokanga mamafa ki ai ‘a e Vahefonua⸍ ko hono tanumaki pea mo hono teuteu’i ‘a e kau setuata⸍ mo e kau faifekau⸍ ‘o makatu’unga eni ‘i honau fatongia fakatauhisipi ki he ngaahi potu siasi⸍. Na’e fakahoko ‘i he ngaahi uike si’i na’e toki maliu atu⸍ ‘a e kemi fakatautehina ‘a e kau faifekau ‘o e Vahefonua pe sinoti Tonga⸍.

Na’e hoko ‘a e ngaahi ha’ofanga pea mo e talanoa ngaue⸍ ke lava ai e kau faifekau⸍ ke nau fevahevahe’aki ‘a ‘enau ngaahi talanoa⸍ [stories] pea mo ‘enau ngaahi a’usia fakangaue⸍. ‘I he ngaahi fevahevahe’aki ko ‘eni⸍ na’e hoko ia ko e fakakoloa he feako’aki ai ‘a e kau faifekau⸍ ‘i he ‘enau ngaahi a’usia⸍. Ko e tataki na’e fai ‘e he puleako⸍ na’e lava ai ke toe fakaloloto ange ‘a e vakai ‘a e kau faifekau⸍ ki he maama ‘o e tohitapu ‘i he ‘ātaki ‘o e ‘aho ni.

Ko e kemi [retreat] ko ‘eni⸍ na’e tataki ia ‘e he puleako ‘o e kolisi tohitapu Trinity. Neongo na’e tokolahi e kau faifekau na’a nau mo’ua pea ‘ikai ke nau lava ange ka fiefia ‘aupito ‘a kinautolu na’a nau ‘i aii ‘i he fakakoloa na’e fai ‘e he kemi fakatautehina ni.