The works we do today, will bring blessings for tomorrow.

Na usuia le fonotaga a Ta’ita’i a le Mafutaga a Tama’ita’i o le Sinoti Samoa o le Ekalesia Metotisi Niu Sila (MTSSEMNS) I Willow Park Christian Camp I le Aso Faraile 29 Aperila ae fa’ai’u I le Aso Sa 1 Me, 2022. E to’a 64 sui usufono ma sui fa’alogologo Tama’itai sa auai I lenei fa’amoemoe, e aofia ai ma le afioga i le Peresitene o le Mafutaga Tama’ita’i Sinoti Samoa, faletua ia Suresa Tufuga, fa’apea le Sui Peresitene po’o le Tina o le Sinoti Samoa,
le faletua ia Fa’apaiaga Ieli, ae tainane le Siapelini le afioga I le Sea malolo, le susuga ia Suiva’aia Te’o, ma le paia i faletua o le Aufaigaluega, Peresitene o Mafutaga ta’itasi aemaise sui usufono ma alo tama’ita’i o Itumalo e 6 o le Sinoti Samoa, sa auai I lenei fa’amoemoe.

E ma’eu le matalasi ma le silisili ese o le alofa o le Atua aua ua maualuga lona lava viiga ma le fa’ane’etaga ia te ia, ona o mea tetele na ia faia, ae tainane o lana pule fa’asoifua na afua ai ona manuia ma fa’ataunuuina lenei fa’atasiga ma lenei fa’amoemoe, ua avea ma ala e toe feiloa’i ma fesilafa’i ai le Mafutaga Tama’ita’i I pu’e o manu ‘ae le o pu’e o mala, ma ua taunuu ai fo’I nisi o upu a le atunuu- O Lupe nei sa vao’ese’ese a’o lenei ua fuifui fa’atasi. Talu le alofa matalasi o lo tatou Mataisili I le lagi.

Sini o le Mafutaga I lenei tausaga - “O galuega o le asō, e manuia ai taeao”
“The works we do today, will bring blessings for tomorrow”.

O le polokalame sa tapenaina lava e le Komiti Fa’afoe o le Mafutaga, mo le fonotaga I lea lava weekend. Ma o nisi o itu taua o lenei Mafutaga, ua le gata o le fa’atauaina ai o alo Tupulaga Tama’ta’i o aulotu ma matagaluega ta’itasi sa auai, ae fa’apea fo’i sui ole Mafutaga o lo’o auauna i tofiga o le Mafutaga Tama’ita’i a le Ekalesia aoao i Niu Sila nei, ae fa’apea fo’i nisi o Tama’ita’i o tauaveina tofiga ua le gata I le Sone a le Pasefika e pei o le faletua po’o le tausi ia Olive Tanielu, ae fa’apea fo’i le faletua ia Leu Pupulu ma le fetalaiga ia Itamua Roberson, o loo tauaveina nisi o tofiga o le Ekalesia Metotisi aoao o le lalolagi.

O le vala’aulia fa’apitoa a le Mafutaga mo le pō o le Aso Faraile I le tatalaina o le Fonotaga, o le Afioga I le Peresitene o le NZMWF le tausi ia Tuituivao Salevao ma lana Komiti Fa’afoe.
Sa saunoa le Afioga I le Peresitene ia Tuituivao e fa’ailoa lona agaga fa’afetai I le vala’auina o ia ma lana Komiti Fa’afoe, ona tu’u lea o le ta’i 5 minute I lana Komiti fa’afoe e fa’asoa mai ai I o latou lava matafaioi fa’apea fo’i ma galuega o lo’o faia, ma mea o lo’o tutupu ma o le a tutupu aua le latou tula’i mai i nei tofiga. Sa manaia lava fo’i nai commercials a lenei Executive sa fa’aalia I lena afiafi ua lē uma le talitaliē ai o le Mafutaga, ma sa fa’afiafiaina fo’i sui o le Fonotaga I le va’ai I le tula’i mai o nei tama’ita’i o le Mafutaga a Tama’ita’I a le Sinoti. i nei fo’I tofiga.

E fa’aleo ai fo’i le fa’afetai tele lava I le Afioga I le Peresitene ia Tuituivao ma lana Komiti Fa’afoe aua le taliaina o se vala’au atu o lenei itu o le galuega ma le opogiina o le fa’amoemoe o le Mafutaga a Tama’ita’I o le Sinoti. Ia fa’amanuia le Atua I toe taimi o le tou paeaiga ma le tula’i mai ai i ia tofi. MTSSEMNS are behind you all the way!

I le afiafi lava fo’i o le Aso Faraile, na fa’afofoga ai le Mafutaga i Sa’afiafiga po’o tributes o nai Tinā o le Mafutaga ua fai I lagi a latou folauga talu mai le fonotaga mulimuli I le 2021 – le Faletua/Tiakono ia Piula Unasa-Su (Kisipone), Faletua ia Olive Ela Isaia (New Plymouth), Tinā ia Akaka Paga Pauta Fa’avae (Manurewa), Tinā ia Fa’ai’uga Sega Pine (Papatoetoe), Afioga Tuioti Lumepa Lesea Leausa Fuimaono (Taeaomua) ma le Tinā ia Leo’o Faiane Matamua (Taeaomua) E fa’afetaia ai fo’i le Susuga i le Siapelini Rev. Suiva’aia Te’o aua le Ta’ita’ina o lenei Sauniga fa’apitoa e toe fa’amanatu galuega lelei a nei Tina ua loa tausaga o galulue I totonu o le MTSSEMNS - “E ua maliliu toa, ua ma’imau ai a’upega o le Taua”.

O le Aso To’ona’i na amatalia ai le Fonotaga a le MTSSEMNS. Fa’afofoga le fonotaga I ripoti ‘ese’ese mai Itumalo e 6, fa’apea fo’i ma Komiti ‘ese’ese o lo’o auauna iai le NZMWF I le NZMWF ma o lo’o va’aia lava le alualu I luma o galuega a Mafutaga / Itumalo ta’itasi fa’apea fo’i Komiti ‘ese’ese.

O le malo fa’aaloalogia (Guest speaker) i lenei Fonotaga o le faletua po’o le tausi ia Fa’amanu Palelei.
Matagofie le fa’asoa a le Faletua ia Fa’amanu I galuega ma avanoa o lenei polokalame o lo’o
va’ava’alua ai le Sinoti Samoa ma le organisation o lo’o galue ai o le Skills NZ. Ma o le tatalaina fo’i
lea o se avanoa mo nai matua latou te a’oa’oina ai basics tau fa’ale-computer ma nisi lava tekonolosi o lo’o fa’aaoga e le to’atele I lenei vaitaimi. A mae’a fo’i le course e maua
le laptop e tu’u ma oe pe a mae’a au 200 itula I le kosi.

Na amata le fa’asoa ale malo fa’aaloalogia I lana lava fa’asoa e uiga I lona ia lava olaga fa’aleagaga I le soifua mai I totonu o le Ekalesia EFKS ona o le mafutaga ma lona aiga le fetalaiga ia Semau Palelei, o le ala lea na o’o ai loa I le Matagaluega I Manurewa, ma o le a savali I le 30+ tausaga o lo’o galulue pea I totonu o lenei Matagaluega ma o iina fa’atoa iloa ua maua ai le aulotu e pele I lona fatu ma lona agaga ma e fiafia fo’i e fesoasoani I galuega fa’aletupulaga I totonu o le latou lava Matagaluega. O se mea sa ia maitauina o le fa’atauaina o Tupulaga I tofi I totonu o Aulotu / Matagaluega, Sinoti fa’apea fo’i le Ekalesia aoao. Na fa’asoa fo’i le Faletua e uiga I grants ma nisi lava courses o lo’o ofaina e le latou kamupani aua le fa’alauaiteleina o le silafia o tagata o le Sinoti, ina ia si’isi’i ai I luga o latou totogi – ma sa saunoa fa’amalosi fo’I Fa’amanu I le Mafutaga, aua le tumau pea I le mea o lo’o iai, you are worth more than you know! O avanoa ia e le au maua e le to’atele o Ekalesia, ae fa’afetai I le faletua ia Fa’amanu mo lenei avanoa tau aua maua, e fesoasoani mai ai i tagata o le tatou Sinoti.

Sa fa’ai’uina le polokalame o le Aso To’ona’i I se Aoga Tusi Paia ma se Quiz/Games night na saunia e le Susuga I le Siapelini Rev. Suiva’aia Te’o. Sa matua fa’atumulia lenei afiafi e le gata I le Agaga Paia e ala I le Aoga na saunia, ae matua ova le ‘ata ua tau le mafai e nisi o Tina ma Tama’ita’i manava I le ova o pauga ‘ata na maua I ta’aloga na saunia.

O le a’oga na saunia, o le fa’amanatu lea I galuega lelei uma sa faia e Susana Uesile, fa’apea fo’i Loi ma Eunike – Tina o le aposetolo ia Timoteo I le fa’afaileleina lea o le fa’atuatua o Timoteo fa’apea fo’i ma Sione Uesile, ia avea ma se galuega taua tatou te faia ma fa’atinoina e ala I lou fa’atuatua, e fai ma mitamitaga I fanau a’o se uili mautu fo’I ua latou mauaina mai ia i tatou ma lo tatou fa’atuatua. Ona fa’auma lea I Vaega e 3 sa vaevaeina ai le fonotaga, Loi, Eunike & Timoteo ma faia nai taaloga fa’ale Tusi Paia ma isi lava ta’aloga.

Fa’afetai tele lava I le afioga I le Siapelini le afioga I le Sea malolo, le Susuga ia Suiva’aia, mo le lava tapenaina ua le gata I Sauniga sa feagai ai, ae fa’apea fo’i o A’oga Tusi Pa’ia, ma nai ata pupu’u sa fa’afiafia ai le Mafutaga.

Ina ua mae’a le Sauniga Lotu na Ta’ita’ina e le afioga I le Peresitene o le Mafutaga ia Suresa ma le Ofisa o le Mafutaga I le taeao o le Aso Sa, atoa ai fo’i ma le Sauniga o le Fa’amanatuga sa ta’ita’ina e le afioga I le Siapelini le susuga ia Suiva’aia Te’o, ona feofoofoa’i fo’i lea o le Mafutaga e ala I saunoaga fa’ai’u, ona tapunia aloa’ia loa lea o le Mafutaga i le saunoaga ma fa’amanuiaga a le Afioga I le Sui Peresitene, o le Tina fo’i lea o le Sinoti, le faletua ia Fa’apaiaga Ieli, ona lulu’a’ao loa lea ma fa’amavae ma fa’atofa.

Ia tumau atu ia I le Atua poto e to’atasi lona lava viiga, o lona mamalu, o lona silisili’ese ma le fa’ane’etaga, ona o vavega tetele o loo molimauina ma atagia mai ua le gata I galuega faia a Tama’ita’i mo le Sinoti Samoa lava ia, ae ua fa’apea fo’I le Ekalesia Metotisi aoao I Niusila nei, o le Vasa Pasefika, I le ae fa’apea fo’i le Mafutaga a Tama’ita’i Metotisi aoao o le lalolagi atoa.

IA VI’IA OE! IA VIIA OE! IA VIIA LAVA OE! E FA’AVAVAU, FA’AVAVAU LAVA, SOIFUA