Na’e kau fakataha ‘a e Vāhenga Ngāue Saione, To’utupu Tonga Trust pea mo e ngaahi siasi ni’ihi ‘i he fakamālohisino ‘o e toutu’u kumala .

Ko e fa’ahinga fakamalohisino lelei foki he ‘oku ma’u ai mo e me’atokoni ma’ae fāmili. ‘I he ngaahi uike si’i kuo toki maliu atu na’a nau ma’alali e polopolo mo e ola lelei ‘enau ngaahi ngoue.

Na’e pehē ‘e he setuata lahi ‘a Saione, ‘Uhila Manase ko e me’a fakafiefia ‘a e mamata ki he fiefia ‘a e ngaahi famili pea mo ‘enau kau fakataha mo honau kainga ‘i he polopolo ‘o ‘enau konga toutu’u.

‘I he ta’u ni foki na’e toe tokolahi ange ‘a e ngaahi kulupu na’e kau mai ki he toutu’u.

Na’e ‘ikai ke ngata pe ‘i he kāinga mo e siasi ‘o Saione ka na’e toe kau mai mo e komuniti hange ko e setuata ‘a Epsom pea mo e ni’ihi mei he ‘enau potungāue ‘a tangata, pisope mei he Māmonga, ni’ihi mei he kalapu inukava mei Onehunga, kalapu Tofoa pea pehee foki ki he ni’ihi mei he kalapu Longolongo.

Na’e toe pehē foki ‘e he setuata, ‘Uhila Manase ko e taha he me’a ia ‘oku tokanga ki ai ‘a e siasi ko hono faka’ai’ai ‘a e to’utupu ke nau manako ‘i he ngoue.

‘Oku hoko ‘a e toutu’uu ko ha faingāmalie ia ke ngāue fakataha ai ‘a e mātu’a pea mo ‘enau fānau pea pehē foki ki he ngaahi kui. Ko e founga eni ke lava ai ‘a e mātu’a ke faka’ai’ai pea mo ako’i ‘enau fānau ke manako ki he ngoue. Ko e founga mahu’inga ‘aupito eni he ‘oku lava ai ‘a e mātu’a ‘o paasi atu ‘enau ‘ilo pea mo ‘etau taukei ki he fānau ke nau hoko atu’aki ki he kaha’u. Ko e founga ngoue mo e manako ngoue ‘i Tonga ‘oku kei malava pē ia ‘o fakatolonga mo hoko atu ‘i muli ni ‘o hangē ko e founga ko eni ‘oku nau ngāue’aki ‘i he toutu’u kumala.

Ko e makehe’anga ‘o e founga ‘oku ngāue’aki ‘e Saione mo e To’utupu Tonga Trust, ko hono fakaafe pe ‘omai ‘a e kau fakafofonga mei he ngaahi potungāue ‘a e pule’anga ‘a ē ‘oku nau tokoni’i ‘a e ngāue mo e polokalama ‘a e toutu’u kumala. ‘I he kātoanga polopolo ‘o e ta’u ni na’e me’a ‘a e minisitā ‘o e kakai ‘o e Pasifiki , Hon. Aupito Su’a William Sio. Na’e me’a ai foki mo e kau fakafofonga mei he Potungāue Ako, ‘a ia na’e taki mai ai ‘a Yvette Guttenbeil-Po’uhila mo Kuovatisi Sēkeni-Fononga. Na’e fakafofonga mai foki ‘a Melaia Lousi mei he MPI.

Na’e taa’imālie foki ‘a e kātoanga ni ko e lava mai ‘a e ongo sekelitali ‘o e Vahefonua , Tau’atāina Tupou pea mo Tesi Manukia ‘o poupou mai ki he langa ngāue ni.

‘Oku ‘amanaki foki ‘a Saione ke toe faka’ai’ai ke toe tokolahi ange ‘a e manako ki he toutu’u kumala pea mo e faka’ai’ai ‘a e fānau ke nau manako ki he ngoue.