O le taeao na totō fa’aifo ai manū mai lagi, ina ua avea le afioga i le Peresetene, Rev Andrew Doubleday e fai ma sui o le Ekalesia Metotisi Niu Sila, e fa’apaiaina ai le Susuga ia Paulo ma le Faletua ia Faapaiaga Ieli, e fai ma Sea o le Sinoti Samoa, Ekalesia Metotisi Niu Sila.

O le aso ua ula, o le aso ua tau tupu, ina ua lalago fa’atasi moemitiga a le tagata fa’atuatua, ma le Alofa Tunoa o le Tapa’au sili i le lagi, ua sao ai ma uli le fa’amoemoe. Ua ātu ē ai nei la le faga i pa’au, ae loloma le faga i lalau, ma ua moni ai le tatalo ma le sa’afi a le fatupese Eperu, “Lo’u agaga e, ia e fa’amanu atu ia Ieova, o mea uma foi o i totonu ia te a’u, ia faamanūina lona suafa pa’ia, aua ua tau i manū le fa’amoemoe o le Sinoti Samoa ona o lou Finagalo Alofa.

O le fa’amoemoe sa lupe o le Sinoti Samoa aua le fa’apa’iaina o lona ofisa fou, le Afioga i le Sea o le Sinoti, le susuga Paulo Ieli, le Fofoga o le Sinoti, le Afioga ia Toleafoa Tuimauga faapea le Teutupe o le Sinoti, le Tofa Feagaimaalii Naasona Te’o, aua tofi ma tiute ua valaauina e le Atua mo lona Finagalo.

O se sauniga sa fa’apa’iaina faatasi ai foi ma Ta’ita’i o Tupulaga, le Tamaita’i ia Sina-i-Faleū Pupulu ma le Susuga ia Corinthian Ieli, ae fa’apea foi Tausi Itumalo ma Konevina o Komiti eseese o le Sinoti.

E ui lava o sauniga e masani ai le Ekalesia fa’apea le Sinoti Samoa, ae o se sauniga na silasila ai le Sinoti Samoa i le mamalu o le Atua, e ala i le vala’auina ma le fa’aaogaina o ana auauna, e fa’aauauina le misiona o le fa’aolataga na ia ulua’i tapenaina.

O se sauniga matagofie ona vaega uma aemaise o le fetalai mai o le Atua e ala i lana upu folafola na tomatauina ai le Ofisa fou ma Ta’ita’i uma o le Sinoti Samoa e le afioga i le Peresetene.

O le afioga i le Peresetene, le susuga ia Andrew Doubleday ma le Sui Peresetene ia Etuwini Talakai, na ta’ita’ina le sauniga, ona o le fa’apa’iaina lea o le Sea o le Sinoti Samoa, le susuga Paulo Ieli ma le Faletua.

O le tatalo fai fa’atasi a le Sinoti Samoa, ia fa’amanuia tele le Atua i le tula’i mai o le Susuga Paulo Ieli ma le faletua ia Faapaiaga i le ta’ita’ina o le Sinoti Samoa, aemaise o lona ofisa, ia auomanū o latou faiva ma tiute, ma ia tapenaina fa’ale-agaga i latou uma mo le feau ma le galuega ua vala’auina ai i latou e le Atua.

Isaia 40:10 Aua e te fefe, auā ou te ia te oe; aua le fetepatepai, auā o a‘u o lou Atua; ou te faamalosia oe; e moni, ou te fesoasoani ia te oe; e moni, ou te taofia oe i lo‘u lima taumatau e i ai le amiotonu.

O se aso foi na pā’i lagi ai le manogi o taulaga na osiosi e le Matagaluega Taeaomua, ina ua malama i lagi lona taeao, e ala i le valaauina o Matua o le Matagaluega, e ave ma Matua o le Sinoti Samoa.

Ia manuia tele lau malaga fa’ale-fa’atuatua Sinoti Samoa i lenei tausaga 2022, ma ia apepeleina lou soifua e lo tatou Matai Sili i le lagi, mai fita o le malaga ma le faama’i.