I le fa’ai’ui’uga o le tausaga ua mavae 2022 i galuega fai a Aulotu, Matagaluega, Sinoti ae fa’apea le Ekalesia aoao i ona Komiti eseese, na fa’apena fo’i ona usuia ai le fonotaga fa’ai’u a le Aulotu Samoa i Tokoroa, atoa ai fo’i ma le va’ai atu e le gata i fuafuaga fai o le fa’ai’uga o le tausaga, ae fa’apena fo’i le va’ai mamao atu mo taualumaga mo le Tausaga Fou o muamua, ae fa’apea fo’i ma le lumana’i.

I le fonotaga fa’ai’u lava la a Tokoroa, na alofaiva ai mo le filifiliaina o se Ta’ita’i Fou a le Aulotu, e sui tulaga i le afioga ia Ma’ilata Maua’i, o le sa tauaveina mai lenei tofiga taua mo le tele o tausaga ua mavae. Ma, i le i’uga la o le filifiliga a le Aulotu mo se Ta’ita’i e sui-tulaga i le afioga ia Ma’ilata e pei ona mua’i ta’ua, na tasi moemoe ai le finagalo o le Aulotu mo le fetalaiga ia Pouniu Levao e avea ma Ta’ita’i, fa’atasi ai ma le faletua ia Vanessa e avea ma faufautua i le galuega mo le ta’ita’ina o le Aulotu i lenei fo’i vaega o le Ekalesia ma le Sinoti.

E tusa ai ma tulaga ma aiaiga a le Ekalesia Metotisi i Niu Sila nei o loo fa’apea fo’i ona fa’atino ma mulimulita’i ai galuega a le Sinoti Samoa, o le ala lea, i le ulua’i Lotu aofa’i a le Itumalo o Manukau na faia lea i le Aso Sa 26 Fepuari 2023 i le malumalu i St. Paul i Otara, na fa’apa’iaina ai le Tofi Ta’ita’i o le susuga ia Pouniu ma le faletua ia Vanessa Levao, aua le ta’ita’ina o le Aulotu Samoa i totonu lava o le ‘a’ai i Tokoroa, i le vaega o Hamilton, ma le Itumalo fa’ale-sinoti i Waikato Waiariki.

O se sauniga na va’aia ma molimauina le lē-ofi o le malumalu, ona ua le gata i le auai uma o Matagaluega ma Aulotu a le Itumalo i Manukau, ae fa’apea fo’i le to’atele o sui o le Mafutaga a Tagata Pasefika i totonu o Tokoroa e aofia ai To’elau, o Niue, o Rarotonga ae maise ai fo’i o le to’atele o sui o tagata Samoa, atoa ai ma tauaiga o le susuga i le Ta’ita’i ia Pouniu ma le faletua ia Vanessa na mafuta mai mo le molimauina o lenei fa’amoemoe taua e pei ona mafuta ma tapua’i ai i lea lava aso.

O se tasi o vaega taua na ta’ua ai fo’i i lea lava fo’i mafutaga, na fa’ailoa mai ai e le Mafutaga a tagata Pasefika; o Pouniu, o loo ia tau’aveina fo’i le tofi Peresitene o le Mafutaga ma le fa’alapotopotoga a Tagata Pasefika i lea lava itu o le atunuu.

Ua le gata fo’i i ia tulaga e pei ona fa’aalia, ae mo le toe fa’amanatu mo nisi e le’o silafiaina, o le faletua ia Vanessa, o le alo fa’asino i le tamā ia Letoa Alesana Letoa ma le Tausi ia Amerika. O le fetalaiga ia Letoa, o se tasi o Toa manumanu o le Sinoti mai lava i le fa’atuina o ulua’i Aulotu Samoa i lea vaega ma lea Itumalo o le Atunuu, o ia o se tasi na finau malosi mo le galuega Samoa, ma na i’u ai lava fo’i na fa’atuina ai ma le Aulotu i Tokoroa e pei ona o’o mai lava i nei ona aso. Ona manatua ai lea o nisi o muagagana a le Atunuu – E soso’o lava le Fau ma le Fau. Ua tofafā mai i Atutia Letoa ma Amerika, a’o lea ua tula’i mai Pounia ma Vanessa e fa’aauau lo la’ua Vala’auina. O le susuga fo’i ia Pounia ma Vanessa, na o la tausi ma le fa’amaoni, ma o la’ua lagolago malosi i le galuega fita i le taimi o le talutalu-fou o le galuega Samoa a Letoa ma Amerika i Tokoroa.

Manuteleina lo oulua Vala’auina; ma ia saga fa’amanuia le Atua i lo oulua tula’i mai, aua le ta’ita’ina o la tatou Aulotu i totonu o Tokoroa.