fai’angalotu Huli Mā’oni’oni, ‘i Papakura. Ko e fai’angalotu ni foki ‘oku kau ki he Vahenga Ngāue Tokaima’ananga, ‘a e Vahefonua Tonga ‘o Aotearoa.

‘I he kuohili na’e tauhi faka-faifekau pē ‘a e kaingalotu ni ‘e he Faifekau Pule ‘o e siasi lahi ‘o Vahenga Ngāue Tokaima’ananga ‘i Otara, Rev Sione Lea’aetoa, ka kuo hoko ‘a Popua ko e tauhi fakalaumālie ma’a Huli Mā’oni’oni, ka ‘i he malumalu ‘o e Faifekau Pule, Sione.

Ko Rev Popua Naidu na’e memipa he Siasi ‘o Dominion/Kingsland mo hono fāmili pea ne toki hū ki he ‘apiako faka-faifekau.

Ko hono ua, ko Rev ‘Ofa Taipaleti Taukolo – fakanofo ki he peulisi ‘o Napier, Hawke’s Bay. Ko e fakahoko ngāue ‘a ‘Ofa ko e fengāue’aki umataha (partnership) ‘a e Lower North Island Synod ‘a e kau pālangi mo e Vahefonua Tonga. ‘E tauhi ‘e ‘Ofa lōua ‘a e kainga palangi mo e kau muli pea mo e kainga Tonga foki.

Ko Rev ‘Ofa Taukolo na’e hiki mei Tonga ‘o memipa he siasi ‘o Mo’unga Heamoni, Northcote, pea ne toki kanititeiti faifekau.

Ko e kaingalotu Tonga ‘o Napier foki na’e fokotu’u ‘e Rev Dr. ‘Ēpeli Taungāpeau ‘i he ta’u 1998, pea kau mai pē ‘a e kaingalotu ni ki he Vahefonua Tonga ‘o Aotearoa ‘i hono fokotu’u he 2003, kae tauhi pe ‘e he faifekau mei he siasi pālangi ‘o Napier.

‘I he me’a ‘a e Faifekau Sea ‘o e Vahefonua, Rev Kalolo Fihaki, ki he kaingalotu he ‘aho fakanofo ‘o ‘Ofa, na’a ne pehē ‘oku mahu’inga ‘a e umataha ‘a e kau pālangi mo e Vahefonua he founga fehikitaki ko eni.

‘Oku fakalakalaka e ngāue fehikitaki he fetakinima ‘a e kau palangi mo e kau Tonga, ko Kalolo ia.

Na’e pehē ‘e Kalolo ko e matapā eni kuo faka’atā ‘e he Vahefonua Tonga ke fetakinima mo e kau pālangi he ‘e lava ‘e he faifekau Tonga ‘o tauhi lōua ‘a e pālangi mo kitautolu Tonga.

Ko e faifekau ‘ahi’ahi hono tolu, ko Rev Sokopeti Feki Sina – fakanofo ki he peulisi ‘o Whanganui. Ko e fakahoko ngāue ‘a Sokopeti ko e fengāue’aki umataha (partnership) ‘a e Lower North Island Synod ‘a e kau pālangi mo e Vahefonua Tonga. ‘E tauhi ‘e ‘Ofa lōua ‘a e kainga palangi mo e kau muli pea mo e kainga Tonga foki – ‘o tatau pe mo Rev ‘Ofa Taukolo ‘a e founga.

Ko e Puleako ‘o Trinity College, Rev Dr Nāsili Vaka’uta, na’a ne fakahoko e malanga fakanofo ‘o Rev Sokopeti.

Ko Sokopeti foki na’e memipa he peulisi Tonga ‘o Tawa, Wellington, pea ne toki ako faifekau.

Ko e faifekau ‘ahi’ahi hono fā leva, ko Rev Paula Moala – fakanofo ki he peulisi pālangi ‘o St Paul’s Parish, Hamilton. Ko Paula foki ko e memipa ‘o e Vahefonua Tonga ka ‘oku ne ngāue taimi kakato ma’a e sinoti ‘a e kau palangi ‘i Waikato. Na’a ne mēmipa ‘i Tokaima’ananga pea ne toki kau ki he langa fo’ou ‘o Huli Mā’oni’oni ‘o ne hoko ko e faihiva mo e setuata.

Na’e hoko foki ‘a Paula ko e taha ‘o e kau ngāue ‘a e ‘AtaOngo Tonga Aotearoa – va’a fetu’utaki mo e tekinolosia ‘a e Vahefonua Tonga.

Na’e fataki ‘e he Puleako ‘o Trinity College, Rev Dr Nāsili Vaka’uta, mo e ‘apiako ‘a hono teu’i ‘a e kau faifekau ni.

Fakafeta’i e ngāue.