Na nona matalia na turaga ena ulunivanua ni matalia MACIU 17:1 – 9 MACIU 17:2 A SA MATALIA NA YAGONA E MATADRATOU, A SA SERAU NA MATANA ME VAKA NA MATANISIGA, KA SA VULAVULA MAI NA NONA I SULU ME VAKA NA RARAMA.

Au sa vakabula raraba yani kina loma ni Wasewase ko Viti kei Rotuma E Niusiladi, ni bula nai Talatala Qase, dou bula talega na veitacini vaka I Talatala, kemudrau saka nai Talatala Qase Vakacegu, Mikaele Yasa kei Talatala Peni Tikoinaka, kei kemudou nai tokani vaka I Talatala kei na kena I vavakoso lomani.

Nai takitaki vakayalo ena i Lalakai ni Wasewase sai koya nai ulutaga levu ni macawa vakalotu eda se qai vakanadakuya tiko qo, “Na Matalia”, se na nona matalia na turaga ena ulunivanua ni matalia. “The Configuration” or Jesus Configuration in the Mt of Configuration. Ena i talanoa ni lesoni ka koto I cake oqori, e koto kina na nona digitaki ratou na lewe tolu na tisaipeli qo ko Jisu, ko Pita, kei rau na veitacini ko Jemesa kei Joni, me ratou lako cake kina Ulunivanua, ka ratou sega ni kila, ni sa koto kina na nona i tuvatuva na Kalou Bula, me ratou laki sota kina ko Jisu kei rau na Parofita levu qo, ko Ilaija kei Mosese, ni vakarau nai lakolako lesu ki Jerusalemi, me vakayacori kina nai lesilesi mai Lomalagi, kai cavacava ni veiqaravi I Jisu, sai koya na delana mai Kalivari. Eda rogoca ena I talanoa ni lesoni, ni ratou sa yaco ki cake ko Jisu kei ratou na tisaipeli, sa qai matalia mai nai rairai kei Jisu, ka vaka nai serau ni matanisiga na matana ka sa vulavula mai na nona I sulu me vaka na rarama. Sa qai sikavotu mai ko Mosese kei Ilaija vei Jisu ka ratou veitalanoa. Ena nodratou sarava toka na tisaipeli na veika sa yaco tiko, sa qai cavuta ko Pita, Turaga, sa vinaka na nodatou tiko eke, ke ni vinakata, me keitou tara e tolu na vale vakacevaceva, me dua na nomuni, ka dua me nei Mosese ka dua tale me nei Ilaija. Sa qai voqa mai na domo ni Kalou ena loma ni O vei ratou, OQO NA NOQU GONE NI TOKO AU SA DAU VINAKATA VAKALEVU. DOU VAKAROGOCI KOYA.

NA NONA MATALIA NA TURAGA

E vica na ka eda raica ka vulica ena lesoni ni nona matalia na Turaga, nai matai, na nona digitaki ratou na lewe tolu mai vei ratou na vo ni tisaipeli, e vakatakila na bibi ni nodratou digitaki me ratou muria na Turaga ka vakadinadinataka na nona matalia na Karisito. Nida raica na veika e yaco ena ulunivanua, ena nona matalia mai ko Jisu, sa seraka sara ga mai na kena I rairai dina Vakalou ka tukuna ni o koya na Luve ni Kalou, mai nai tutu vaka Luve ni Tamata ka ratou kila na tisaipeli ka ratou dau lako vata voli ena veiqaravi, me ratou raica ka vakadinadinataka ni ko Jisu e Luve ni Kalou ka sinai tu ena I serau , nai ukuuku kei nai yau Vakalou. Qo na ka e ratou digitaki kina mai vei ira na vo ni tisaipeli, ni ratou ka voleka sara vua na Turaga, {Jesus Inner Circle} ka levu na gauna e dau kacivi ratou me ratou dau lakovata ka vakadinadinataka na veigauna bibi eso dau vakayacora kina ko Jisu eso na veika lelevu se ena veigauna dredre eso e sotava. Na rua na ka e vakatakilai vei ratou na tisaipeli, Nai tutu vaka Luve ni Kalou {Son of God} ka matalia kina na kena I rairai kei nai tutu vaka Luve ni Tamata {Son of Man} ena I rairaivakatamataka ratou lako vata yani kina ka kilai koya talega kina, sa dusia vei ratou me ratou Vunautaka ka vakadinadinataka ni ko Jisu e Luve ni Kalou ka sinai ena I serau kei nai ukuuku Vakalou, kei nai yau vakalomalagi, ka vakatalega kina na nona I tutu vaka Luve ni Tamata, ka dusia na bula ni Dauveiqaravi Yalodina ka vaka Dravudravuataki koya me luvata tu yani nai serau kei nai ukuuku Vakalou e Lomalagi, ka mai sucu ka bula, ka veiqaravi ga vakatamata, ena I tutu vaka Luve ni Tamata, ni vakararavi duadua ga vua na Tamana, ka vakamalumalumutaki koya me veiqaravi ena bula ni vakarorogo kei na talairawarawa vua na Tamana. {Filipe 2:5 – 11}. “In his divine nature, Christ was fully God. In his human nature, he was fully man.”Na rua nai tutu bibi oqo, ei dusidusi vakayalo toka vei keda nida kacivi talega ena cakacaka ni noda tomana na cakacaka vinaka sa mai vakadavora oti ko Jisu I Vuravura, na Kosipeli ni Veiyalayalati Vou, kei na nona mai solia na nona bula me mate ena Kauveilatai ka tucake tale ena vukuda kei na noda I valavala ca, me rawa ni ciqomi keda tale na Kalou ka veivinakati tale kei na tamata, ka dolava na katuba ni Loloma titobu Vakalou sa mai matana taka ko Jisu Karisito me rawa ni daru solia na nodaru bula, ka vakatokai me daru Luve ni Kalou {Joni 1:12} ni daru sa serauni ena I serau kei nai Ukuuku Vakalou ka lumuti kedaru kina na Kalou na Yalotabu, me waqa tu kina na cina Vakalou oqori ka daru qarava yani na cakacaka vaka Luve ni Tamata ena nodaru vakadadamuria na Karisito ena I yaloyalo ni Dauveiqaravi Yalodina, ka vakadravudravua taki kedaru ena nodaru solia na nodaru gauna, na nodaru bula, na kedaru kei na medaru, na nodaru I yau kina cakacaka ni loma ni Kalou kei na nona Lotu Savasava. Me daru vakadadamuri Jisu na nodaru Turaga kai Vakabula ni daru solia na nodaru bula mei madrali bula kai votamate ni Lotu Savasava I Jisu. Sai koya ga oqori nai naki ni nodratou kacivi na lewe tolu me ratou vakadinadinataka na veika e yaco ena Ulunivanua ni matalia, ka Vunautaka ka toqa talega ena I Volatabu, me rawa ni da kila ka vuli kina, ka vakabibi na noda matanataka ni da tomana na cakacaka bibi sa mai tekivuna ko Jisu kei ratou na tisaipeli, kei na Veitalaki nei Jisu ena Maciu 28:19 – 20, O koya mo dou qai lako ka Vakalotutaki ira na lewe ni veivanua kecega, ka papitaisotaki ira ena yaca ni tamamudou, kei na Luvena kei na Yalotabu. Vakavulici ira me ra Vakabauta na veika kau a Vosa kina vei kemudou, ka mo dou kila talega niu sa tiko vata kei kemudou, ka yacova nai Yalayala kei Vuravura. {The Great Commision}

Ena matalia ni rairai kei Jisu ena nodratou sota kei rau na Parofita ko Mosese kei Ilaija, sai otioti tiko ni nona I lakolako I Vuravura me sa tavuki lesu ka mua nai lakolako ki Jeruisalemi me laki vakacavari kina na nona veiqaravi ka davo mai Lomalagi, ka sa dusia talega vei keda nida sa lako tiko ena I otioti ni taba gauna ni tiko nanamaki ena nona lesu mai na Turaga, ka dina ga ni sega ni dua e kila na gauna cava, na Kalou na Tamada ga sa tiko mai Lomalagi, ia eda sa vakayadrati tikoga mai vua na Kalou na Yalotabu, ena nodra Parofisai na Parofita ena Veiyalayalati Makawa me vakayadrati keda ena veika ena yaco mai, ka vakakina na Kosipeli I Jisu ni Veiyalayalati Vou me dusia vei keda na Sala meda muria, ni sa tu kina na Dina ka na rawati talega kina na Bula. Ena nodrau mai veivakadeitaki talega na Parofita e rua ko Mosese kei Ilaija vei Jisu ena I talanoa e wiliki vei keda, e sai dusidusi talega vei keda meda vakavakarau ni se siga toka, ni sa Vuravura ga ni vakavakarau ka lekaleka wale na bula eke, ka da sa lako tale tikoga ena I otioti ni noda I lakolako I Vuravura ni bera ni lesu mai na Turaga, meda taura matua nai dusidusi ni lesoni ka wasei tiko vei keda, ka qarava yani ena yalodina na veikacivi kei na veitalaki oqori nei Jisu, nida sa vakatokai talega meda Luve ni Kalou {Joni 1:12} ka sa tu vei keda nai serau ni Kalou ka solia vei keda na Yalotabu meda cakacakataka yani na loma ni Kalou I Vuravura ena I tutu vaka Luve ni Tamata Dauveiqaravi Yalodina ka muria na we ni yavana na noda Turaga ko Jisu Karisito sa mai sabolotaka e Vuravura. Tukuna ko Jisu ena Maciu 16:24, Okoya sa via muri au, me kakua ni muri ana lomana, ia me colata ga na nona Kauveilatai ka muri au. Me noda vata na Vakacegu kei na Veivakalougatataki ni noda Kalou Bula ko Jiova. Emeni

“In his divine nature, Christ was fully God. In his human nature, he was fully man.”