Lesoni; Vakatekivu 37, 39 ,40, 41, 45 (Nai Talanoa kei Josefa)

Na bula vinaka ni Lotu e na veigauna ni mataka e vakatautaki ki na nodra vakalotutaki ka vakavulici vaka vinaka nai taba gone nikua. Mai veivakananumi kina e NZ na Qase Levu mai Viti, Talatala Ili Vunisuwai, “Me rau kua ni veitawasei vakadua na Lotu kei na Vuli”. E na laki kunei talega kina na bula vinaka ni Vanua kei na Matanitu. Na nodra macawa nai taba gone e na yabaki oqo e ra goleva kina na vei bolebole e sotavi e vale, vanua ni cakacaka, vala ni veivesu, vale ni Tui kei na bolebole mai vei ira na kedra meca.

Nai talanoa ni nona bula ko Josefa mai na i Vakatekivu wase 37- 45, e tukuni kina na bolebole ka lako curuma ni bera na kena soli vua me lewa na vanua taucoko ko Ijipita (Vakatekivu 41:41-46). E vosota galugalu voli ga ko Josefa na veika rarawa kece e a lako curuma ka tekivu saraga mai vale. Na bolebole ni bula mai vale e vakavurea nodratou lomaca-taki koya na tuakana ka ratou a volitaki koya yani me yacova sara na vale ni veivesu. Ia sa tiko oti nai naki ni Kalou vei Josefa.

Rua na vakasama.

1. Na Kalou sa dau muria na vei sala vuni e so me vakarautaki ira kina nona tamata digitaki. E tiki ni veivakarautaki o’ya na kena bolei na bula. E tini ka lima na yabaki nona biuti tamana kei iratou na tuakana ko Josefa ni bera nodratou sota tale. Mai na nodratou via vakamatei koya ka volitaki koya na tuakana, e ratou qai sota tale ni sa lewa tu na vanua taucoko ko Ijipita ko Josefa. E sega ni biuti Josefa vakadua na Kalou e na nona bula mai vale, biu e na loma ni keli, e ligadra na dauveivoli, vale ni veivesu kei na matadra na kena meca.

E sala muri Josefa voli ga na Kalou ka maroroi koya me yacova sara nona laki tamata yaco e na vanua ko Ijipita. E ratou buki vere na tuakana me yaco na lomadratou ca vei Josefa, ia na Kalou sa nakita me taqomaki koya ka vakarautaki koya ki nai tutu ni veiliutaki. E vakabauta ko Josefa nai lesilesi ni Kalou vua ka tukuna kina vei iratou na tuakana ‘ni sa talai au na Klaou me’u liutaki kemudou me ia na vei vakabulai , sega walega e nona vuvale, e na vanua taocoko ko Ijipita.

Sa na rawa vei keda na tamata vakabuta me da na dau ni vei vakabulai kevaka e da vosota na vei bolebole e so ka waraka na nona gauna na Kalou. ‘Ia ko ira e ra sa waraki Jiova e ra na vakaukauwataki tale…’ (Aisea 40:31). Sa ka bibi vei keda na qase noda vakavulici ira tiko nai taba gone niuka me ra ciqoma na vei vakarautaki e na loma ni Lotu me rawa ni ra na sotava kina vaka vinaka na vuravura levu sa tadola tu qo e matadra. E sega soti ni rawarawa ka ni tu vata kei na kena vei bolebole sa wasei tiko mai e na Macawa ni Tabagone. Sa bolei sara talega kina vaka bibi na Lotu nikua me raica na vei sala e so me ra vakalotutaki ka vakavulici kina na i taba gone. Vakatavulica na gone e na sala e dodonu me lako kina. Ia ni sa qase mai, e na sega ni lako tani mai kina (Vosa Vakaibalebale 22:6).

2. E solia wale mai vaka i loloma na Kalou na vei solisoli kei na taledi e so me da vakayagataka me rawa kina na Bula. Na tadra vei taravi nei Josefa sai solisoli ni Kalou vua me bula ka vei vakabulai talega kina nona loma ni vuvale, vanua ni cakacaka, vale ni veivesu, vale ni Tui kei ira nona meca. E vakatucoko-taka nona i solisoli vei Josefa na Kalou ka veitaudonui kei na vanua kei na gauna me cakacaka-taka kina. E ratou kune Kalougata kina nona vuvale kei na vanua ko Ijipita ni vei-semati vakavinaka na loloma ni Kalou kei na vakabuta ka bulataka ko Josefa.

Na bula e na vuravura totolo ka veitemaki e ra sa bula donumaka noda cauravou kei na gone yalewa nikua sa rauta vaka vinaka ga na vakararavitaki ni bula vei Jisu e na nodra tuberi me ra dau Lotu, masu, lolo, ka vulica vaka vinaka nai Volatabu. Sa sega talega nai ulubale vei keda nai tubutubu kei ira na cauravou kei na gone yalewa e NZ nikua. Sa tu oqo na cakacaka, na vuli, qito toro cake kei nai veisolisoli soli wale vaka i lavo ni Matanitu. Ke qai sega ni rawati na bula vinaka, sa na rawa ni da wili me da vakasabusabutaka nona loloma soli wale na Kalou vei keda. Me da na tu vakarau talega me da sotava na kena revurevu. Sa ka bibi na noda veikilai vaka vinaka kei Jisu nikua me rawa ni da raica kina nona veivakarautaki na Kalou ki vei keda. “o koya sa raici au, sa raici tamaqu”(Joni 14:9).

Ni sega na veikilai kei Jisu, sa na rawa kina me batabata nodra qaravi Kalou nai taba gone ka sega talega ni malele na lomadra ki na vuli. Sa na rawa ni yaco kina na kavoro ni matavuvale, sega na cakacaka vinaka, vesuki e na vei vei yalo ca e so, ka rawai rawarawa mai vei ira na meca. Sa na laki vakilai sara talega na kena revurevu e na Vanua, Lotu kei na Matanitu. Sa gaunisala vinaka duadua e na nodra bula na i Tabagone nikua na nodra tuberi me ra sotava vaka dodonu na vei bolebole e so ka vakadruka na meca e na gauna e ra sotava kina, me vaka e lako curuma ko Josefa. Sa i tavi ni Lotu nikua e NZ me ra tuberi vaka vinaka na i tabagone me rawa ni ra tomana nai lakolako ni vei qaravi kei na veivabulai e na veisiga ni mataka.

Mo ni Kalougata ka Qaqa nai Taba Gone e na Lotu kei na Vuli.

Emeni.