(JEREMAIA 6:16 , SA KAYA VAKAOQO KO JIOVA , “DOU TU ENA SALA KA VAKARARAI,KA TAROGA NAI LAKOLAKO MAKAWA,SE SA I VEI NA SALA VINAKA,IA DOU LAKO GA KINA,DOU NA QAI KUNEA KINA NA VAKACEGU NI YALOMUDOU.”

Dou sa bula vinaka tale mai Liuliu ni nodatou vei Tabacakacaka e 6 ena Loma ni wasewase o Viti kei Rotuma e Niusiladi.Sa mai lamata tale oqo vei kedatou nai ka lima ni vula ka sa toso totolo sara tiko na soko.E mudremudre toka na cagi ni veisau ka totolo sara tiko na kui eda sa muria.E vuqa vei keda, e da naulu sara ena kena viko ka sa tekivu me da sa silima na kena biau.E da sa vakasaqara talega e so na noda I vakaukauwa me rawa ni da tatakube kina me kua na ciri,se lutudromu.

E nai ulutaga digitaki ena noda I Lalakai ena vula oqo ko Me e vakatokai tiko me vula I Doi.Na vula ka sa cabeta yani kina na yabaki me sa laki veimama kina.Sa dau matua kina ka keli talega kina na “uvi” leleka.Ena so na vanua sa dau kamikamica vinaka sara tu ga kina na “Kawai”.Na Doi sai koya e dua na mataqali kau.E na so na vanua na “selavo” ka dau vulavula vinaka na sena.Na vula talega oqo, sa dau tekivu me tawa kina na qa ni kumala ni sa tekivu me dabe na lewena.Sa dreu na tarawau.Mai waitui sa dau basika vunavuna mai kina Salala ka dau rawarawa sara na kena qolivi.Oqo e dua na gauna ka mai vakatakilai koya kina na Draki ena kena dau liwa na kena cagi tataba ka tau na kena uca me dusia ni sa oti na vula I cagilaba.Sa dau dolava na wasawasa kei na kena kena I ukuuku me vakadeitaka vei ira na dausoko ni oqo sa kena gauna vinaka me sa sorosila kina na laca ka sili sevusevu kina na uduudu ni waqa vakaviti.

Na veika e yaco ena vula oqo e matana taka tiko vakavinaka na veika eda sa qaravi oti, ka me da yacova e dua na gauna ni tatamusuki.Nai rairai ni vakavakarau ena kena tei na uvi,Na nodra qarauni vakavinaka na kau vuata kei na kena yadravi vakamatau nai qoliqoli me qai rawa ni da namaka na tatamusuki me yaco na kena gauna me da taleitaka na veika eda tamusuka.

E na I taba ka ratou digitaki toka ena noda I lalakai ena vula oqo e tauri mai ena 2019-2020.E dusia nai yaloyalo ni noda vakavakarau.Na nodra vakarautaki vakamatau na Luveda e dusia nai yaloyalo ni ‘Rai Lesu”.Ni vakarautaki vakamaqosa na uvi kei na kakana vuanikau ,yadravi vakavinaka nai qoliqoli,ena liwa ka mudremudre vinaka na kena cagi, me dusia ni dua na ka e teivaki,e na waraki me na tamusuki.

O ira na luveda era I vakadinadina ni solesolevaki ni noda toso.Na ‘niu’ ni lutu e lutu ga I vuna.Sa via dusia na lagilagi ni noda rai lesu.Na veiqaravi kei nai vakavuvuli eda solia vei ira na luveda,sai koya sara ga koya na veika eda na marautaka na tamusuka ena kena vula.

Sa bibi kina veikeda na noda taleva lesu na veika vinaka e da sa qarava oti mai ena loma ni noda I Wasewase,Tabacakacaka kei na vei Valenilotu.Me da tu mada ,meda vakararai,meda vakatataro,Meda qai tekiduru vata ka gole vua na Kalou me dolava vei keda na sala vinaka me rawa ni da na muri kina.Sai koya saka oqo kemuni nai tokani na vakacegu dina.Na nona vakacegu na Tamada sa cecere sara ena dui Yaloda vakayadua ga.

Na noda vakamareqeta vakamatau na veika e da kilai tani kina.Na noda I tovo kei na kena I ukuuku.Na noda sere kei na noda meke.Ena vanua e da sa mai bula kina oqo ka yavalati ,me cakacakataki kina na noda vakabauti Kalou. Sa dua na sala vinaka ni kena caramaki na mataniwai ni Yaloda.Na kena susugi ka yadravi nai lakolako makawa ena dusia ni sa cava na gauna ni cagilaba ka cadra na vunilagi ni noda veisotaraki ni da sa vakaligaliga kece yani ena noda I tei,me da marautaka na noda I sevu vua na Tamada.Ni da vakamatautaka na rai lesu,e da sa valuta tale tikoga kina na dravudravua kei na lecaika.E vuna ga oqo ni da sa yadrava me da vakabulabulataka na sala vinaka.E da sa vakabulabulataka me da veisureti ka dolavi keda ki na vakacegu ni lomadaka ia na veivakacegui.

E ke,sa mai tamusuki kina na I tei ni gugumatua kei na soli bula ena kena sa mai ciqomi nai sevu ni veiqaravi.Na kena sa volai na veika baleti keda ena noda vosa.E da bolei tale eke.O cei me na vulica?,se o cei me na veivakatavulici?.

E da gole lesu tale ki na noda I tekitevu me da na sarava ga kina na veisala kecega e da vakatura.E da sa vakauqeti na noda, me da kauta vata mai na noda I sigana ka mai marautaka vata kei ira na luveda ena sala e da sa digitaka me vinaka, ka kune kina na noda vakacegu, kei na vakacegu ni Yaloqa sa vakavuna veikeda na Kalou na Tamad,kei na Kalou na Luvena kei na Kalou na YaloTabu.