UNITE AGAINST COVID-19

Ua fa’afagogo tagiao i le fa’afofoga ma le fa’alogologo le taualaga pea o le aufaigaluega ma i latou o lo’o gafa ma le una’ia malosi o le fe’au aua lava le fautuaina o o tatou tagata ina ia fai o latou tui puipuia o le Koviti19. O se mataupu o lo’o leoleoā i luga o Televise ma la’au fa’alogologo, fa’apea tusitusiga i nusipepa, ma ua maitauina ai se tulaga faigata e afua mai i a i latou o lo’o ta’ita’ia nisi o fa’alapotopotoga e o’o lava i Ekalesia Kerisiano. 

 O se tulaga faigata lea i se maitau, ona ua i ai lava le talitonuga i tagata lolotu o le vala’auina o le faife’au, e na te momoli le mea moni ma le mea sa’o i tagata lolotu, ma o iina e fa’avae i ai so latou talitonuga, o le a le fe’au e momoli ma fa’ailoa atu e le faife’au, o le mea sa’o lea ma le moni. O le faigata lea o fete’ena’iga o lo’o tula’i mai i le taimi nei, ona e ‘ese’ese auala o lo’o faaliliuina ai le Tusi Pa’ia ma ana a’oa’oga. 

Pau lava le tu’ualalo a le auauna i le Pa’ia o le tatou Sinoti fa’apea fo’i i latou o lo’o fiafia e faitau lenei pepa, tasi lea vaega na tele ina fa’aalu ai taimi o Iesu a’o i ai i le lalolagi ma lana misiona, o le faamaloloina o so’o se ma’i. E leai lava se ese’esega ma le tula’i mai o lenei fa’ama’i i le lalolagi, ua i ai lava lo tatou talitonuga, o le mana fa’amalolo o le Atua e ‘ave’ese ai lenei fa’ama’i. Peita’i, o se vaega e ao ona silafia, e i ai le galuega a le tagata e ao ona fa’atino. 

 O le tele o gasegase na fa’amalolo e Iesu, na mafua ona silafia e Iesu le gasegase, ona ua alu atu le tagata ia te Ia ma aioi atu. O nisi fo’i o gasegase e le’i o i a Iesu, ae o nisi o aiga ma uo na latou fa’ailoa ia Iesu, ona fa’atoa faia ai lea e Iesu o se galuega fa’amalolo ma manuia ai. O lea ua tatou i ai i le taimi o le Agaga Pa’ia, a’o lea ua afioa’e Iesu i le lagi ma nofo i le itu taumatau o le Nofoali’i o Lona Tama. 

 O tiute o le Agaga Pa’ia, e na te tu’umumusuina i tatou ma fa’ailoa mai le finagalo o le Atua ma Lona Alo o Iesu Keriso. O lona uiga, o le tiute o le Kerisiano, o le fa’atino o le finagalo o le Atua e pei ona tu’umumusu mai ai Lona Agaga Pa’ia, aua e faigata ona fa’atino e le Agaga Pa’ia se galuega faitino, ona ua na’o se Agaga, a’o lo tatou vala’auina lea le Au fa’atuatua. 

O tatou o lea ua fai ma vae ma lima e fa’atino le finagalo o le Atua i lenei lalolagi. A lailoa le Aufaigaluega ma nisi o lo’o galulue malosi e fautuaina i latou e le’i faia o latou Tui o le Koviti19 ina ia fa’atino ia vaega uma aua le malu puipuia o fanau ma aiga, tainane o le sosaiete o lo’o tatou i ai. O lea fo’i ua i ai le fa’amoemoe o le Aso 12 – 14 Novema, o le a faia ai le isi Tuiga i le nofoaga i Mt Smart Stadium. A’o le logo a Masefau e tata pea, aua se manuia lelei o o tatou tagata. Fa’ailoa o tatou tutu fa’atasi e tete’e i lenei fa’ama’i – UNITE AGAINST COVID-19. 

Rev Falaniko Mann-Taito