O le Viiga i le Atua i mea aupitoaluga, ma le manuia i le lalolagi, o le finagalo alofa i tagata.(Luka 2:14)

O le alaga lea a le ‘au-agelu ina o molimea manusina e faailo le fe’au o le Kerisimasi, e tusa ai ma le soifua mai o le Pepe o le Faaolataga i le lalolagi. O le fe’au o loo faamua ai le VIIGA o le ATUA i lona FINAGALO ALOFA i tagata, ua MANUIA ai le LALOLAGI.

E 33 tausaga o tauāta’i mai lenei fa’amoemoe tāua o le Atua, a’o lea faato’ā faataunu’uina, i le maliu fa’alava’au o IESU KERISO i luga o le SATAURO. Pe tusa nei ma le 2022 tausaga, talu ona tatou faamanatu lenei FINAGALO ALOFA o le ATUA, e ala i le MALIU ma le TOETU o IESU, ua MANUIA ai le LALOLAGI, e pei ona tatou faamanatu i lenei vaitaimi o le tausaga.

O se lagona foi lea o le Itumalo i Hawkes Bay nei, e VIIA ai le ATUA i mea aupitoaluga, ona o lona finagalo alofa i le lima vaivai o le Matagaluega i Heisitini nei, ua IA tapena ma saunia ai ALA o MANUIA e pei ona tu’umumusu ai e lona AGAGA PAIA le tofa ma le uta a le Matagaluega, ua mafai ai ona maua manuia tau seleni (tupe), faatupeina ai lenei galuega.

E fitu (7) tausaga o tauāta’i mai lenei galuega tele. O le 2015 na amata ai ona talanoaina le galuega ma saili loa se tusiata na te tusiina se ata o le hall, ina ia faaaogaina mo sailigātupe, pei ona tusi talosaga ai i Trusts eseese, Lottery, Hastings City Council ma isi faapotopoto. O le faataligatuli ma le lē faalogo o le Tusiata i mea e manana’o iai le Project Komiti a le Matagaluega, na faamuta ai loa le faaaogaina o lea Tusiata, ae saili le isi Tusiata e faaauauina le galuega.

O le feagai ai ma le koviti-19 i le tausaga 2019, 2020, 2021, na lē gata ina toloi ai le galuega, ae faapea foi le oso-maualuga ai o le tau, mai le tasi ma le afa miliona i le 2015, i le fa miliona fa selau afe tala i le faaiuga o le 2021.

Peita’i, o ala o manuia o le Atua na tu’u mumusu ai lona Agaga Paia i le Project Committee, na maua ai le faamāmā avega, i se tasi o Kamupani (Apollo Project Ltd) na pa’ū ai le tau i le $3,692,049.

Na tu’uina i lalo le hall tuai i le faai’uga o le 2020, ae o le tuai ona maua o se kamupani taugofie e fausia le hall, na tuai ai ona amata le galuega.

O le aso 19 Mati 2022, na faapaiaina ai le Ma’a Faavae, ma amata ai loa le galuega. O Iakopo P Faafuata na ta’ita’ia le sauniga, ae o le afioga i le Peresitene o le Ekalesia (Rev Andrew Doubleday), na faapaiaina le Ma’a ma laugaina le Upu a le Atua. O faamanuiaga na saunoa iai le Tama’itai Pulenuu (Mayor) o Hastings (her worship Sandra Hazlehurst), ma le afioga i le Sea o le Sinoti Samoa, le susuga ia Rev Paulo Ieli. O le susu’eina o le veli poo le ufiufi o le ma’a, sa saunia lea e nisi o toe ulutaia o le Itumalo, le tinā matua ia Oketopa Sali ma le tinā matua ia Jean Oliver. O nisi o le Sinoti na auai i lenei fa’amoemoe, o le faletua o le Sea ia Faapaiaga Ieli, le susuga ia Rev Ieremia ma le faletua ia Matila Amituana’I, faapea le fetalaiga ia Namulauulu Robertsob ma le tofa ia Itamua Robertson. O le taumafataga sa saunia i le Toitoi hall faafesagai ma le falesa. O le upu faafetai mo le au valaaulia na saunoa iai le susuga i le Parish Steward susuga ia Olive Tanielu.

O le sauniga i le Aso Sa na soso’o ai, na ta’ita’ia lea e le afioga i le Sea o le Sinoti, o le susuga ia Ieremia Amituana’i na faitauina le Afioga Paia a le Atua, a’o le Lauga na saunia lea e le afioga i le Peresitene o le Ekalesia. Na mae’a le sauniga, ona alo foi lea o le Matagaluega i faaaloaloga e masani ai aso faapenei, ona soso’o ai lea ma le taumafataga i le Off The Track.

O le hall, e aafia ai le auditorium (300 tagata e ofi ai), commercial kitchen, ofisa o le Faifeau, 2 potu fono, 1 children’s room, 3 falemalolo 3 showers mo tama’ita’i, 3 falemalolo 3 showers mo alii, falemalolo ma le shower mo tagata e le atoatoa le malosi, o le stage and 2 large store rooms.

Faamoemoe o le aso 20 Novema 2022 e mae’a ai le galuega.