O upu ia na faailo ai le agaga o le faafetai ma le faamalo I le Atua ona o lona alofa ma lona faamaoni ao alo faiva le tamaitai loia ia Claudia Tuluvao Malaeolema Futi I ona faiva alofilima o nei tausaga e tele ua tuanai atu.

O le Aso Faraile 11 Mati na fa’ae’e ai pāpā o le tamaitai o Tuluvao Futi, ma molimauina e nisi o le Aufaigaluega ma faletua, o ona matua, le susuga I le Tausi Matagaluega ia Faleu ma le faletua ia Talapauna Futi, o uso ma tuagane, faapea foi aiga, ao uo foi ma aumea mamae le faaulufaleina o ia I totonu I le saofaiga a Loia faamaonia o le Asosi a Tamaitai ma Alii Loia o Aotearoa Niu Sila. O se aso taua ma le faapitoa lea aso ona ua aofia moli I futiafu e tasi, sei patipatia le alofa o le Atua, aua e talitonu ana le seanoa le Atua I lona alofa ma lona faamaoni, pe le o mafai ona faataunuuina lea faamoemoe na moemiti iai.

Ona o le koviti ma aafiaga o lea na faia ai lea Sauniga mamalu I luga o upega tafailagi, ma faafofoga ai I le tolaulauina o suafa uma o alii ma tamaitai ua faaulufaleina I le asosi, ma na saunoa foi le afioga I le Faamasino o le Fale faamasino e taliaina aloaia I latou uma o e na faapea ona tali atu I le valaau a le Atua e ala I le ofoina o le soifua e avea ma Loia I Niu Sila nei ina ua maea sailiiliga ma lo latou a’otauina mo lea tofi taua.

Na maea lea ona faia loa lea o le Sauniga Lotu e le susuga ia Suivaaia Te’o o le Tausi Matagaluega I Magele Tutotonu, o le matagaluega na galulue ai le susuga ia Faleu ma le faletua ma le nofoaalo, ma o iinei foi I le tausaga e 2015 na amata ai le aoga a Tuluvao I le Iunivesite o Aukilani I le faaloia. O se tamaitai filemu, tausaafia ma e tumu I le faaaloalo. Na avea o ia ma Taitai o Tupulaga a le Matagaluega, o le teutupe foi mo Tupulaga I le isi tausaga. Na galue I le aufaipese, Aoga Aso Sa, Mafutaga Tamaitai ma le Autalavou.

Na saunoa le susuga ia Faleu ise molimau matagofie e uiga ia Tuluvao ma lona soifua aoaoina ma lona taumafai. Faapea foi le susuga I le alii faifeau ia Arona Tusani o le uncle o Tuluvao, I le agaga ua faatumulia I le olioli ona o Tuluvao ma lona taumafai. Ua ia sii lava le fale o Asomua I le mauga ona o lana faaea I lona aiga ma ona matua, faapea foi le Sinoti Samoa. O nai ona tina matutua ia Mema Fesuluai ma Tuluvao Futi, ua faiilagi le tuligasi’a na manatua foi ma le agaga faafetai aua e ui ina ua tofāfā mai tiasā, ae o I la’ua lava na faia le faiva o le taputapuai ma tu’i atu le muliapapaga ao feagai Tuluvao ma aoaoga. O lea ua tauimanū lona faamoemoe, ma e talitonu foi o loo ua patipatia mai le lagi le la’ua tapuaiga mau.

O upu faamalosi o le aso mo Tuluvao, ‘aua lava nei ia tei tatou, a ia tuuina atu le viiga I le Suafa mamalu o le Atua, ona o lona alofa ma lona faamaoni.’ O le tagata e lulu saito ma loimata, e seleseleina ma le fiafia, o le tagata foi e alu ma tagi fano, o loo ave le saito e lulu, e foi mai lava ia ma le alaga fiafia, o loo aumai ana fusi saito. Lea ua foi mai Tuluvao ma le alaga fiafia ma lana fusi saito o ia o le LOIA FAAMAONIA, ua lagona ai le olioli ma le fiafia, aua ua ia tau le taua lelei, o lea foi ua iu lava ia te ia le tausinioga pei o la le aposetolo. Ao le muagagana a le atunuu: Ua mālie toa ua mālo tau. Ua malie le faga I foa, ua malie le faga I pa’au, ua malie ma le lautua le faga I laua. Faamanuia le Atua I le tofi Tuluvao, o ou māmā na, sagai ane ‘ai o le tai, faatumu lau utu, ia faapena foi ona utupupuina e le Atua lou fofoga ma lau tofā faale Atua, aua ou faivaalofilima. Ia faasaoina nisi ona o lau auaunaga, ia manuia foi nisi ona o lau tautua faaloia. Ia maualuga se viiga o le Atua ona o oe Tuluvao. Ia ta’itoaluaina oe e le Agaga o le Atua. Matou tapuaia ou faiva.

On Friday 11 March 2022, we witnessed the admission to the bar of barristers and solicitors of the High Court of New Zealand via Zoom. One of our very own young people of Sinoti Samoa, Miss Tuluvao Malaeolema Claudia Futi was amongst this group.

It was an auspicious occasion marked by a special thanksgiving service to God, for all that Tuluvao has achieved throughout the last few years of study and hard work that have led to this milestone in her life.

Tuluvao is the third child and eldest daughter of Rev Faleu and Mrs Talapauna Futi, who are in their second-year ministering at Cross Way Union Church in Masterton. Both her grandmothers, the late Mema Fesuluai and the late Tuluvao Futi (her namesake), passed away before this special moment in her life but their prayers and guidance are a testament to Tuluvao’s journey so far. She holds their photos with a big smile as she remembers their teachings in life and faith and knows they are cheering her on in spirit.

We are so proud of Tuluvao and wish her all the best and pray God’s blessings as she goes forward to use her gifts for those in need, in our Sinoti and communities.