“The Pathway to Leadership is Through Service”.

Na usuia le fonotaga a le Mafutaga a Tama’ita’i o le Sinoti Samoa o le Ekalesia Metotisi Niu Sila (MTSSEMNS) I Willow Park Christian Camp I le Aso Faraile 21 ae fa’ai’u I le Aso Sa 23 Aperila, 2023. O lenei fonotaga sa le auai le Afioga I le Peresitene ia Suresa Tufuga ona o tuatuagia fa’aleaiga I Samoa, o le mea lea na avea ai le Afioga I le Sui Peresitene, le faletua ia Fa’apaiaga Ieli o le Tina foi lea o le Sinoti ma Taitaifono o lenei fonotaga I lenei weekend.
E 112 usufono sa auai I lenei tausaga. E ma’eu le matalasi ma le silisili ese o le alofa o le Atua aua ua maualuga lona lava viiga ma le fa’ane’etaga ia te ia, ona o mea tetele na ia faia, ae tainane o lana pule fa’asoifua na afua ai ona manuia ma fa’ataunuuina lenei fa’atasiga ma lenei fa’amoemoe, ua avea ma ala e toe feiloa’i ma fesilafa’i ai le Mafutaga Tama’ita’i I pu’e o manu ‘ae le o pu’e o mala, ma ua taunuu ai fo’i nisi o upu a le atunuu- O Lupe nei sa vao’ese’ese a’o lenei ua fuifui fa’atasi. Talu le alofa matalasi o lo tatou Mataisili I le lagi.

Sini o le Mafutaga I lenei tausaga - “O le ala I le pule, o le tautua”
“The pathway to Leadership is through Service”.

O le polokalame sa tapenaina lava e le Ofisa ma le Komiti Fa’afoe o le Mafutaga, mo le fonotaga I lea lava weekend. O le Itumalo a Manukau sa tatalaina le Fonotaga o lenei tausaga I le Sauniga lotu. O le Faletua ia Matila Amani sa ta’ita’iina le latou Sauniga lotu, o le tatalo sa tapenaina e le Faletua ia Eseta Fonoti ae o le Faletua ia Ruanna Letalu sa fofogaina le upu a le Atua e tomatauina ai le fonotaga.
I le afiafi lava lea, na fa’afofoga ai le Mafutaga i Sa’afiafiga po’o tributes o nai Tinā o le Mafutaga ua fai I lagi a latou folauga talu mai le fonotaga mulimuli I le 2022, ua na’o le tasi le Tina matua, ole Tinā lea ia Tapaleao Naomi Gasu (Papatoetoe).
E fa’afetaia ai i le Susuga i le Siapelini Rev. Suiva’aia Te’o aua le Ta’ita’ina o lenei vaega o le Sauniga fa’apitoa e toe fa’amanatu galuega lelei a lenei Tina ua loa tausaga o galue I totonu o le MTSSEMNS - “E ua maliliu toa, ua ma’imau ai a’upega o le Taua”.

O le Aso To’ona’i na amatalia ai le Fonotaga a le MTSSEMNS. O le itumalo a New Plymouth sa tapenaina le Devotions ile taeao, matagofie tapenaga a le Mafutaga I le latou fa’aevagelia ma le upu folafola na saunia e le Tofa ia Itamua Robertson. E ui lava ina le’i atoa lona soifua maloloina ae na fa’aalia ai le alofa o le Atua pei ona ia tapenaina le upu folafola aua le atina’eina o le Mafutaga a Tama’ita’i o le Sinoti Samoa.

Fa’afofoga le fonotaga I ripoti ‘ese’ese mai Itumalo e 6, fa’apea fo’i ma Komiti ‘ese’ese o lo’o auauna iai Tama’ita’i o le MTSSEMNS ma o lo’o va’aia lava le alualu I luma o galuega a Mafutaga / Itumalo ta’itasi.

O le aso lava lea, na tapenaina ai e le Susuga I le Siapelini le Aoga Tusi Paia e tova ai le fonotaga, ona toe fa’a’au’au lea o le fono ma tu’uina atu ai loa le avanoa I Tupulaga Tama’ita’i aua se latou sao I le fonotaga e ala lea I le polokalame e fa’aaoga uma ai le fonotaga mai e matutua, manaia ua fiafia fa’atasi uma ai le fonotaga ma maua ai fo’i le exercise fa’alemafaufau. Fa’afetai i sui Tupulaga sa ta’ita’iina lenei vaega, Janice Auva’a-Walters (Oratia), Sharlene Malaeimi (Manurewa), Lynley Tai (Manurewa) & Suvania Mann-Tufuga (Henderson). Ae po le po alo le MTSSEMNS I le latou Tausala masani I Fonotaga tele, na matagofie lenei po I sa’asa’aga ma faigataulaga a itumalo ta’itasi o lea sa maua ai le $68,000. Ona fa’ai’u ai lea o lenei aso I le Devotions sa tapenaina e le Taitaifono a le Itumalo Aukilani, Faletua ia Marlene Mann-Taito.

Na fa’a’auau le fonotaga I le Aso Sa, ona sa iai mataupu e lei mae’a na faia ni fa’ai’uga.
Ona sosoo ai loa lea ma le Sauniga Lotu na Ta’ita’iina e le Taitaifono ma le Ofisa o le Mafutaga, atoa ai fo’i ma le upu folafola ma le Fa’amanatuga sa tapenaina e le Susuga I le Siapelini.

Ae paga lava lea, ua moni ai le muagagana e momoe lava ma manu, ae sau mala e atia’e.
Ona o se tala faanoanoa ma le faamomoi-loto ona o se tasi o Tina sa galue ma tautua I totonu o le MTSSEMNS e ala lea I le Mafutaga I Birkenhead ia Leofao Meki, ua valaau iai lona Matai ma fa’amutaina ai ana galuega e pei ona punoua’i ai ma galue ai I le tele o tausaga. Ua moni ai upu a le Aposetolo o Paulo, afai e tiga le itutino e tasi e fa’apena fo’i ona logo le tino atoa. E fa’apena ni lagona na o’o I le Fonotaga ona o se tala fa’anoanoa I le maliu fa’afuase’i o lana auauna.
Tau ia ina iai pea le fa’amafanafanaga ale mana o le Agaga o le Atua I lona Tu’aa ia Laelae aemaise le nofoaalo ua tu’ua na’o I latou ae fa’apea fo’i le Aiga ma le Aulotu I Birkenhead.

Ona feofoofoa’i fo’i lea o le Mafutaga e ala I saunoaga fa’ai’u, ona tapunia aloa’ia loa lea o le Mafutaga i le saunoaga ma fa’amanuiaga a le Taitaifono, ona lulu’a’ao loa lea ma fa’amavae ma fa’atofa.

Ia tumau atu ia I le Atua poto e to’atasi lona lava viiga, o lona mamalu, o lona silisili’ese ma le fa’ane’etaga, ona o vavega tetele o loo molimauina ma atagia mai ua le gata I galuega faia a Tama’ita’i mo le Sinoti Samoa lava ia, ae ua fa’apea fo’I le Ekalesia Metotisi aoao I Niusila nei.

IA VI’IA OE! IA VIIA OE! IA VIIA LAVA OE! E FA’AVAVAU, FA’AVAVAU LAVA, SOIFUA

Lautaliepaia Aumua – Failautusi MTSSEMNS