Kuo lava ‘a hono fakatāpui ‘a e falelotu siasi Metotisi Tonga ‘i Oamaru. Ko e malanga mo e lotu fakatāpui ‘o e ‘apisiasi Oamaru Tongan Methodist Parish na’e fakahoko ‘e he Faifekau Sea ‘o e Vahefonua Tonga ‘o Aotearoa, Rev Kalolo Fihaki, ‘i he Tokonaki ‘aho 25 ‘o Siune, 2022. Na’e ‘i he katoanga ni foki mo Rev Finau Halaleva, ko e Faifekau Pule ‘o e Vāhenga Kosipeli, Christchurch, ka ko e faifekau ‘oku ne le’ole’o ‘a e potungāue ‘i Oamaru, pea mo hono hoa, Fekita Halaleva.

Ko Oamaru foki ko e ki’i kolo ‘oku tu’u he vaha’a ‘o Christchurch pea mo Dunedin. ‘A ia ko e Waitaki District ia, ‘i North Otago.

‘I he fakamatala ‘a e Setuata Lahi ‘o e Vāhenga Ngāue Oamaru, Livai Veituna, na’e monuka e falelotu pea fai leva e ngaahi feinga tokoni fakapa’anga ke fakalelei’i e falelotu mo e holo. ‘Oku kau foki ‘a e ‘api nofo’anga faifekau loki 5 ‘i he koloa ‘a e siasi ‘o Oamaru. ‘Oku tu’u fakataha pe mo e falelotu.

Ko e sekelitali ‘o e siasi ‘o Oamaru ko Katalina Veituna. ‘I he’ene lea fakamatala ‘i he ‘aho fakatāpui ki he ‘a e ngāue na’e fakahoko na’a ne pehē kuo hoko e ‘apisiasi ‘o e Metotisi ‘i Oamaru ko e senitā ia ma’ae kominiuti Tonga ‘i he ki’i kolo ni.

Tatau ai pe pe ko e hā e me’a faka-kominiuti ‘e fai ‘e fakahoko pe ki he koloa ‘ a e Oamaru Tongan Methodist Parish.

“’I he ‘aho 13 ‘o Siulai, 2020, na’e tali ‘e he Ministry of Business, Innovation and Employment (MBIE) ‘emau kole funding ko e $319,299 mo e seniti ‘i he va’a Provincial Growth Fund ‘o e potungāue,” ko e lipooti ia ‘a Katalina.

Na’e ngāue’aki e funding ko eni ki he tafa’aki faka-langafale (carpentry) ki hono monomono e tutulu ‘i he falelotu mo e holo, fakapeito fo’ou, sā fo’ou, liliu e vai mafana mei he ‘uhila ki he kasa, bathroom fo’ou pea mo e ‘ā fo’ou. Fe’unga e fakamole ko ia mo e $192,497 mo e seniti.

‘Ikai ngata ai ka na’e faka-‘uhila fo’ou e falelotu mo e holo, switchboard fo’ou, heating system fo’ou pea mo e heatpumps. Ko e fakamole ki ai ko e $114,343.

Na’e tuku makehe foki ‘a e pa’anga talifaki $28,299 mo e seniti (contingency fund) ki ha ngaahi fakamole kehe.

Lolotonga ‘a e ngāue na’e toki ‘ilo ai e ngaahi tutulu makehe na’e ‘ikai kau he tala fika ki he funding. Na’e toe fai pe kole ki he Ministry of Business, Innovation and Employment ‘o nau tali ke fakakakato ‘e he potungāue mo e fakamole ko ia, ko e fakamatala ia ‘a Katalina.

Ka ko hono fakanaunau ‘o e holo mo e peito na’e ‘ikai kau ia he patiseti ‘a e MBIE. Na’e fakahoko leva ‘a e kole funding mei he Otago Community Trust ‘o tali mai ‘a e $26,278 ‘o kumi ‘aki e misini fufulu peleti, ‘aisi mo e ngaahi naunau kehe ki he peito pea mo e sea fo’ou ‘e 120 ki he holo.

Lolotonga ‘a e langa mo e monomono na’e tuku taimi e ngaahi fāmili ke nau tokoni vōlinitia ki he ngāue.

Ko e taha foki e kau paionia ‘o e siasi pea mo e kominiuti Tonga ‘i Oamaru ko Tonga Havea, ka ko e Setuata Mālōlō ‘o e kāingalotu. Na’e talu ‘a ‘ene ‘alu o va’inga ‘akapulu he kolo he valungofulu-tupu pea ne lata pea fakakaukau ke ne nofo ai pe ai ‘o langa fāmili mo fokotu’u e siasi.

Na’e ‘i he Kātoanga fakatāpui foki ‘a e Setuata ‘o e Metotisi Tonga ‘i Dunedin, Sailosi Pole, mo hono hoa, Kaufo’ou, mo e ngaahi fāmili ‘o e siasi, pea pehē ki he Sea ‘o e Kominiuti Tonga ‘i Dunedin, Palanite Taungāpeau, mo hono fāmili.

Caption pic 1: Oamaru steward Livai Veituna (left), Vahefonua Tonga 'o Aotearoa superintendent Rev Kalolo Fihaki (middle) and Oamaru secretary Katalina Veituna (right)

Caption for pic 2: Vahefonua Tonga 'o Aotearoa superintendent Rev Kalolo Fihaki with members of the Oamaru congregation and guests from Dunedin and Auckland, outside the newly upgraded Oamaru Tongan Methodist Church.

Caption for pic 3: Vahefonua Tonga 'o Aotearoa superintendent Rev Kalolo Fihaki (left) leading the blessing ceremony for the newly upgraded Oamaru Tongan Methodist Church building, assisted by Rev Finau Halaleva (right), minister of Kosipeli Tongan Parish, Christchurch.