Neongo ‘oku kuo faka’atā ‘e he pule’anga ‘a e ngaahi fakataputapui na’a tau anga maheni mai ki ai ka ‘oku ‘ikai ke pehē ‘oku holoa ai ‘a e malohi ‘a e mahaki faka’auha ni ‘i hotau komuniti. Kuo tu’utu’uni ‘e he Vahefonua ke ‘atā e foki e lotu ki he ngaahi falelotu ‘i he mahina ko Mē kae kei fai’aki pē ‘a e taki fakapotopoto ‘a e faifekau pea mo e setuata ‘o e peulisi takitaha. Pea ko e Vāhenga Ngāue ‘Okalani mo Manukau ‘oku te’eki ai ke nau foki kinautolu ‘o lotu. Ko e taha ia ‘a e ngaahi faka’ilonga ‘oku kei mahu’inga pe ‘a e faka’ehi’ehi he ‘oku kei mālohi pe ‘a e tu’unga ‘o e mahaki.

‘I he lolotonga ni ko e ngaahi me’a eni ‘oku kei tauhi mai ‘e he ngaahi feitu’u fakataha’anga kakai ‘o hangē ko e ngaahi falekoloa, kēmisi, pangikē mo e ngaahi feitu’u pehē neongo pē ‘a e faka’ata. Ko ia ‘i he ‘uhinga ko ia ‘oku ‘ia kitautolu pe ‘a e fakapotopoto taha ki hotau malu’i. Ko e ngaahi me’a leva eni ‘oku mahu’inga ke kei tokanga’i:

1. ‘Oku kei fiema’u ‘aupito ‘a e huhumalu’i pea kau ki ai ‘a e fānau ta’u 5 ki ‘olunga.

2. Ko ho vā mama’o pea mo e tokotaha ‘i mu’a ‘ia koē ko e mita ‘e 2 pea ‘oku kei tauhi mai pe eni he ngaahi feitu’u ‘e ni’ihi ‘o hangē ko e pangikē;

3. Ko e tui ‘o e māsi [mask] ‘i he ngaahi feitu’u fakataha’anga kakai neongo kuo faka’atā pe fakangaloku ‘a hono ngāue’aki

4. Fanofano’aki ha koa mo ha vai mafana ‘i he hili ho’o ngāue’aki ‘a e bathroom pea ko ha feitu’u pe ‘oku ke ‘alu ki ai.

5. Ka ‘oku ke ongo’i puke kātaki ka ke nofo ma’u ‘i ‘api

6. Fiema’u ke ke sivi Covid kapau ‘oku ke ngali kehe’ia ‘i ho’o mo’ui hangē ko e hafu ‘a e ihu, tale, fofonu pe langa ‘ulu

7. Kātaki ka ke huhumalu’i flu ‘o kapau ‘oku ke ta’u 65 ‘o fai ki ‘olunga, ‘oku kei fiema’u pē pea mo eni