A theological interrogative question posed by Jesus to His disciples, required an honest, personal, and brutal response. It is an open-ended question posed by the Master to his potential followers. This is the core of our reflections for this month.

Kenai Kau

O cei na Tinaqu? O cei na Taciqu. Na nona taro ko Jisu me tarogi iratou nai tokani ka toka ena lesoni oqo? Sa dua na taro levu? Ka dua talega na taro bibi ena loma ni vuvale, na lotu, na vanua, na vanua ni veiqaravi eda sa lesi, digitaki ka vakaivua tu kina ena noda tu oqo.

Era tarogi nai tokani voleka nei Jisu kei ira era muri vunau voli ena gauna ni nona vakavuvuli voli ko Jisu. Na taro vakaoqo e bibi me saumi vakavinaka baleta ni taro tiko ko Jisu na luveni Kalou ka tiko vua nai mudumudu ni lewa ni veika e vauca na vuravura kei na lomalagi. E taro tiko nai Vakabula kei vuravura ka taroga tiko veiira era via muria na loma ni Kalou na bibi ni digidigi donu ni veiqaravi kei vakatulewataki vakamatau na muri ana we ni yavana koya ka taro tiko ena lesoni oqo.

Yavu cava e dabe toka kina na taro oqo

Ni da samaka na yavu e davo toka kina na lesoni oqo, e vaka e vakagolei keda ko Marika ena bibi ni veibuli ni Kalou me baleta na tamata ena yasa ni bula kece e vauci koya. Na veisusu, na veiqaravi, na muri lewa, nai vakarau nil awa e vauca na nona susugi kei na nona bula galala main a veivakatulewa kei na vakarau nib ula dauveivesuki eso. E dusia vinaka nai tutu ni tamata ena matana na Kalou.
E taro bolebole toka baleta ni tarogi toka kina na nona dina e dua ena bula ni tamata kacivi enai tavi. Ni ra qalini vata nai vola nei Marika oqo e dusia toka ni segani duavata tiko ko Jisu ena so nai vakarau se law ani lotu e vauca toka na gauna koya.

Ena Marika 3:4-6 “sa curu tale o koya ki na vale ni lotu, ka sa tiko kina e dua na tamata sa mate na ligana. 2 Ka era sa vakawanonovi Koya sara vakamatua, se na vakabula o koya na tamata oqo ena siga ni vakacecegu, ka me rawa ni ra beitaki koya kina.3 A sa tukuna o koya vua na tamata sa mate na ligana, "kalawa mai liu."4 Sa qai tukuna vei ira, e tara li me caka ena siga ni vakacecegu na ka vinaka se na ka ca, me vakabulai na tamata se me vakamatei? Ia era sa vagagalu.5 A sa vakaraici ira ena mata cudrucudru, ni rarawataka na lomaqa ni yalodra, sa qai tukuna vua na tamata oqo, "dodoka mai na ligamu!" A sa dodoka yani o koya, ka sa vakabulai na ligana me vaka ga na ligana ka dua.

Na lotu na qaravi ira na tamata. E na tikina e cake oqo e lako sivita eso na ka e vauca tu na lawa ni veiqaravi ni lotu ka via vola vou tale ko Jisu ni bibi na bula mai na lawa. Oqo na uto ni tikina oqo. Na lotu ena vakasama vaka volatabu ni yagoi Jisu. Oya nai balebale ni nona vosa ko Joni 1:14 ni sa yaco na Vosa/Na Kalou me tamata ia e sinai tu ena loloma kei na dina. Na Loloma e dusia na nona veivakabulai ena siga ni vakacecegu. Na Dina e dusi tu ena cakacaka ni vei vakarubuitaki me veivakabulai ena vanua kei na gauna e donumaka ka segani vakuwai koya na lawani lotu ka vauca tu na siga ni vakacecegu.

Oqo na yavu vinaka ni noda veiqaravi ena loma ni vuvale kei na lotu. E bibi na veiqaravi ena yalodina vei ira eda sa madigi meda veiqaravi kina.Na Kalou eda tu ravita na yasa ni bula ni tamata. Ena kosipeli nei Marika e tu ravita tu ga e na yasa ni lewe vuqa ka veivakabulai, cemuri na yalovelavela, rogo na didivara, maroiroi ira na tu vakatikitiki, totaki ira na butuki sobu. Ena Aisea 53: ena mawe se mavo bula ni mavoa ni kena kuita eda sa vakabulai kina. Na lotu na kena cakacakataki ka caka na veiqaravi vei ira na gadreva na veivuke vakaoqo. Na mawe se mavobula ni mavoa koya e veivakabulai.

Ni mai cava nai vola nei Marika e soqona vinaka na kosipeli ni veiqaravi, na veivakabulai ni Kalou, na kena digitaki vakamatau na tamata kei nai vakarau ni veiqaravi, na nodra lomatarotaro na tamata ena kaukauwa vuni ni veiqaravi ka mai tinia toka nai vola oqo na taro oqo “ O cei na tinaqu, se ko iratou na taciqu? Na kenai sau e toka ena nona tikina e 34 “ A sa vakaraici ira era sa tiko vakavolivoliti koya, ka kaya, Raica na tinaqu kei ira na taciqu , ko koya yadua ena muria na loma ni Kalou, sai koya oqo na taciqu, se ganequ, se na tinaqu” Na Kalou sa dau rai wavoliti ira na wekana era gadreva tu na veiqaravi e taucoko ena kena yalo e dina ka yavutaki ena loloma soli bula. Me da masulaka ka kerea vuana Kalou ena loma ni vula oqo me dolava na matada vakayalo ka vakadeitaka na noda qarava nai tavi eda sa vakacolati kina ena yalo ni dauniveiqaravi sega ni lomalomarua. Kevaka sa bibi vua vei Jisu na veiqaravi vaka koya eda sa vakauqeti na Wasewase ko Viti kei Rotuma e Aotearoa ena yalo kei na kenai naki ni noda veiqaravi e ka e taucoko vua na Kalou.

Vakanuinui vinaka ena loma ni vula oqo ko June na vulaii werewere mai na loma ni lekutu kei Waikato/Waiariki.