Kuo fili ‘e he Konifelenisi ‘o e Siasi Metotisi ‘o Nu’usila ‘a e va’a media mo e fetu’utaki ‘a e Vahefonua Tonga ‘o Aotearoa ke ne fakahoko e ngāue livestream ‘a e Konifelenisi 2022.

Ko e ngāue ko ‘eni foki ke fakahoko e Konifelenisi ‘a e siasi he ngalu ope ‘i he founga livestream he Youtube mo e peesi Facebook ‘a e siasi. Ko e Konifelenisi ‘oku lele mei he ‘aho Tokonaki 19 ‘o Nōvema ki he ‘aho 23 ‘o e māhina, ka ‘oku ‘i ai e ngaahi polokalama makehe ‘e hulu he ‘aho Tu’apulelulu 17 ‘o Nōvema mo e ‘aho Falaite 18.

‘Oku fakahoko e Konifelenisi ki Kerikeri, Northland, pea ‘e fakamanatu ai e ta’u e 200 e tu’uta e lotu Metotisi ki he fonua ni.

Ko e ‘AtaOngo Tonga Aotearoa foki ‘oku ‘i he malumalu ‘o e Siaola pea na’e fokotu’u ‘i Sepitema 2021 lolotonga ‘a e lockdown hono ua ‘a e fonua ni koe’uhi ko e Koviti-19 ke ne fakahoko ha ngaahi polokalama ‘i he ope - malanga, failotu mo e fakalaumālie ma’ae kakai ‘o e siasi ne na’e ‘ikai ngofua ‘a e ngaahi falelotu.

‘Ikai ngata ai ka ‘oku fakahoko ‘e he ‘AtaOngo ‘a e polokalama faka-uike ‘a e Siaola ‘oku ‘iloa ko e Lika Ola. Ko e polokalama ‘eni ‘a e ngaahi va’a ngāue ‘a e Siaola – Fāmili Ako Lelei, Fāmili Vā Lelei, Fāmili Taulua, Fāmili Mo’ui Lelei, Fāmili ‘Api Lelei.

Ko e ngaahi va’a ngāue ko ‘eni ko e ngaahi sēvesi ia ‘a e Siaola – Tongan Methodist Mission – ma’ae kominiuti kotoa ‘o ‘ikai ko e ngaahi faāmili pe ‘o e Vahefonua mo e Siasi Metotisi.

‘Oku ‘i ai foki mo e polokalama ‘AtaOngo LIVE ‘oku fa’a fakahoko ‘i he Tu’apulelulu kotoa. Ko e ngaahi polokalama ko eni ‘oku fekau’aki mo e ngaahi ‘isiu ‘e ‘aonga ki he kominiuti.

Ko e ngaahi polokalama kuo ‘osi fakahoko ‘oku kau ai ‘a e ‘initaviu mo e Palēmia ‘o Tonga, Hu’akavameiliku (Siaosi Sovaleni), ‘i he’ene fuofua folau mai ki Nu’usila ni hili ‘a hono fakanofo ia ki he lakanga; ko e polokalama ke fakamatala e tu’unga ‘o e Koviti-19 he fonua ni.

Ko e polokalama ‘e ni’ihi na’e fekau’aki mo e sunami mo e mo’ungaafi Hunga-Ha’apai Hunga Tongatapu - ko e fakatamaki fakaenatula na’e hoko ‘i Sanuali 15 ‘o e ta’u ni.

‘I he lolotonga ‘a e Tongan Language Week pe Uike Lea Faka-Tonga, ‘a ia ‘oku fakamamafa’i ai he fonua ni ‘a e mahu’inga ‘etau lea, na’e fakahoko ai ‘e he ‘AtaOngo e polokalama faka’aho ‘a e Fāmili Taulua.

Ko e taki ‘o e Fāmili Taulua ko Toketā Melenaite Taumoefolau pea tokoni ki ai Norma Sialetonga. Na’e manakoa ‘aupito e ngaahi polokalama ko ‘eni he na’e lauiafe ‘a e kau mamata faka’aho he polokalama online.

Neongo ‘a e foki ‘etau lotu ki falelotu ‘e kei fakahoko pe ‘e he ‘AtaOngo Tonga Aotearoa ‘a e malanga fakamafola ‘a e Vahefonua he Sāpate kotoa, ‘o fakatatau ki he fiema’u ‘a e Vahefonua.

Ko hono ‘uhinga ‘oku he ‘oku ‘inasi mo fanongo malanga ai e kau toulekeleka ‘oku ‘ikai ke nau lava ki falelotu. Pea ko e vahevahe ‘a e Faifekau Sea, Rev Kalolo Fihaki, ki he malanga fakamafola ‘oku vilo takai he ngaahi parish mo e fai’angalotu Metotisi Tonga ‘o Nu’usila ni.