The Lent season in the Christian Calendar is a time of abstinence. Ash Wednesday (02/03/22), marks the first day and signals the approach of Easter.

               Gauna vaka Lede. The Lent Season.

Maciu 4:1-11

E da sa tekivu lako curuma tale oqo na gauna vaka Lede. E tekivu taki e na siga ka vakatokai me siga Vukelulu ni Dravusa ( Ash Wednesday). E tekivu na siga bibi qo e na 02/03/22, ka na cava yani ena dromu ni siga ena siga Vakarauwai-Tabu (Holy Saturday), 16/04/22.

E 6 na Sigatabu ni vakacegu ka rawa ni da kana ka gunu tale kina vakavinaka me bula ka kaukauwa tiko na yago e nai lakolako e na loma ni 40 na siga kei na bogi. E yaco tiko nai wiliwili ni 40 oqo e na vula i tubutubu (spring) e na vakasama vaka Valagi. Na gauna vaka Viti e kovuta na Vula ni Sevu.

Na 40 talega na siga kei na bogi qo sa gauna ni vakavakarau kei na noda dikevi keda vinaka tale (lialiaci) ena noda bula ni muria na Turaga ko Jisu Karisito. E dau vakananumi talega kina vaka yalo na nona a lolo ka Masumasu tiko ko Jisu e na loma ni veikau mai Jeriko.

E dua na kena i vakarau vei ira na Lotu va Karisito e na gauna e liu (Church Tradition) o'ya me dau caka e dua na Lotu ka boro e yadredra na lewe ni Lotu ka ra vabakabauti Jisu Karisito na Dravusa. E kilai nikua me Ash Wednesday ka dau cavuti vata kei na vosa ka cavuta na Kalou vei Atama, Vakatekivu 3:19 " .... Ni ko sa kuvu ni qele ga, Ia ko na suka tale mo kuvu ni qele"

Na veretaki nei Jisu sai vakatakilakila ni veika talega e da na rawa ni sotava e na loma ni gauna vaka Lede qo. Na veiveretaki (Temptation) e vosa ni veibolei ka rawa ni rogoci kina na veika e tovolei me vakadrukai keda se vakacacana noda veiwekani vinaka kei na Kalou.

Na temaki nei Ivi kei Atama e nona i naki na gata me rau kania kina na ka vakatabui me rawa ni rau tawase tani mai kina vua na Kalou. O'ya na "tempt" mai na "Temptation". Na "tempt" e i vakavakadewa vaka valagi ni vosa va Kiriki (Greek) na "Peirazein".

Na i balebale dina va Kiriki ni vosa na "Peirazein" o'ya na 'Test', ka sega ni 'Tempt'. Na Veivakatovolei (Test) ka sega ni Veitemaki/ Veiveretaki (Temptation). Mai na vosa ni Kalou vei Eparama me vakacabori Aisake na luvena, e vaka tovolei (test-taki) Eparama ga kina na Kalou.

Na veiveretaki ka sotava ko Jisu e na loma ni 40 na siga e sega walega ni veretaki mai na Temptation, ia e 'test-taki' se vaka tovolei kina nona kaukauwa (resistance) mai vei Setani. E da na raica na vanua e tiko mai kina na i naki ni Kalou me vakatovolea na kaukauwa nei Jisu ka vakayagataki kina na vei temaki nei Setani.

E da sa dau raica ga vakalevu na yasana ni vei temaki/veretaki me sala ki na Bula druka. Sa dodonu me da raica ni sala ni vei temaki e i naki ni Kalou me vakatovolea ka rawa laveta na bula ni noda Vakabauta mai na dua nai vakatagedegede ki na dua tale.

E qai oti toka ga nona Papitaisotaki ko Jisu mai na Joritani sa vakakauti koya na Yalotabu ki na loma ni veikau. (Maciu 4:1) Sa qai kauti Jisu cake na Yalotabu ki na veikau me dau veretaki koya kina na tevoro.

Me da na vakananu tiko ni nona vakauti Jisu qo na Yalotabu e veikau, sega me laki temaki walega, me vaka e da kila, ia me na laki vaka tovolei kina (Test).

Bible Dictionary - Test : A trial to manifest a persons real character.

E cakacaka yaco na Kalou me vaka tovolei ka vakaukauwataki Jisu ni bera nona i lakolako ni veiqaravi. Nai wiliwili na 40 e kovuta e dua na gauna yalani va-Kalou (Divine space of time). E cakacakataki e na loma ni gauna yalani oqori e dua nai tuvatuva ni Kalou ka uto ni kena vakasama na veisereki, veisaututaki kei na vei vakabulai.

Na Taro me da na taroga se sa vaka tiko e vei na noda veikilai, bula vata, ka sala vata kei na noda Kalou ?

Na gauna vaka Lede oqo sa gauna vinaka ga ni noda liaci keda tale me rawa ni da veisau. Sa gauna me da vakananumi lesu kina ki na veika lelevu sa vakayacora oti na Kalou ki na noda bula.

Mai vua na Kalou, sa dau yaco mai e na gauna qo na nona veivatakilai, veiyalayalayalati kei na nona veivakamataliataki (Revelation, Covenant, Transfiguration). E na noda yasana, sa dodonu me talave vaka kina na noda so-Kalou vaka yalo ka talai rawarawa ki na nona vosa. Me rawa kina ni da vakasavasavataki, buli vou ka vakarautaki ki na veitalai ni Bula ni vakadinadinataki Jisu Karisito e na vei siga.

Me'u tinia, na veisau ni gauna, sa kauta vata talega mai na veisau ni Bula. E na veika bula kece, e mate ka vuca na yago makawa, ka kadre se basika e dua na bula se yago vou.

E na vakasama vaka i Volatabu, ni da ciqomi Jisu Karisito, e na takali na bula makawa ka dodonu me basika e dua na Bula vou.

Na gauna vaka Lede oqo sa gauna ni Masu kei na Lolo ka waraka na veiceguvi ni Yalotabu. E da sa vakauqeti kece kina me rawa ni da votai vata kei na veibuli vou ni Kalou e tiko kina. Me biu na bula makawa ka yaco na bula vou.

Ia kevaka sa tu vata kei Karisito e dua na tamata, sa qai buli vou, sa lako tani na veika makawa. Raica sa yaco me vou na ka kecega (2Koronica 5:17)

Emeni.