Tauvaga Pese Autalavou Itumalo Manukau 2023

O se afiafi e fa’atusa i le tala e fai i le alo o le Tuiatua, le leo malie o siufofoga o aufaipese ese’ese. Masalo e fa’apea leo o au agelu o lo’o ifoifo ma pepese i le nofoalii o le Atua, pei ona molimau le Aposetolo o Ioane, aua o le upu moni ua suifefiloi lagona o lea afiafi, o le taimi ua ata o le taimi foi ua maligi loimata, ina ua goto i le taele o le loto feau e momoli mai e pesega. Ua tonu ai upu e fa’alogo soo ai, e lē pese le lauga ae lauga le pese.

E le gata i le leo malie o siufofoga o alii ma tamaitai pepese, a’o le matagofie o togiga ma laei na fa’aogaina i lea afiafi. O laufofoga fiafia ma le mata’atata o laina pito i luma e oo i le pito i tua, se e muliai ni oli ao ni foli. E iloa mamao atu lagona ma feau o le a momoli mai e le pese a’o le’i lagiina. A tu’u atu foi i le fa’atinoina o le galuega a alii ma tamaitai taimipese ma tala’au, e le’i alo tamala i le tapenaina o la latou pitola’au.

Afai ua sīoa ma fia falealili fua le au maimoa ma le au matamata i lea afiafi, ua tatau. Aua o le matagofie o tapenaga uma na totogo ae ai lagona o le fiafia, lagona o le olioli, na lagonaina ai foi le auai o le mamalu o le Atua. Afai na e ulufale ma ni avega mamafa ma ni mafatiaga tuga, o le upu moni e te foi i le fale ua e malolo. O nisi ua fa’apea ane, maimau pe ana umi aua ua lē uma le fia fa’alogologo pea, ua lē uma foi le fia va’ai. Peitai o le mau masani e le uma le fai aso o le Atua, e toe tapenaina foi e le Atua se laolao i le lumanai e toe fa’ataunu’uina ai lenei fa’amoemoe taua.

O lenei tauvaga pese o se fa’amoemoe sa fa’amaite e le susuga i le Konevina o Autalavou ma lona ofisa, le susuga ia Richard Manua ma le mamalu o le ofisa, Lautalie Aumua ma Fa’aliliu Fe’omaia, o se tasi o polokalame na fa’ataoto ma fuafua mo mafutaga a Autalavou o lenei tausaga. Fa’ailoa e le susuga i le Konevina i lana saunoaga autu i lea afiafi, ua luasefulu tausaga talu o taoto lenei fa’amoemoe, a’e fa’afetai i le Atua i le avanoa ua aumai e toe fa’aolaola ai lenei polokalame taua.

O le fa’amoemoe maualuga o le ofisa, ia avea tauvaga pese o se tasi o auala e toe fa’atupulaia ai galuega fa’ale- autalavou i totonu o le Itumalo, ia avea foi o se avanoa e mafuta ma fa’amasani atili ai alo ma fanau. A’o le naunautaiga sili o le ofisa, ia avea o se avanoa e toe fa’aiila ma toe fa’aaoga ai taleni ma agavaa na fa’amanuia ai le Atua ia i tatou. O le feau fa’amanatu lea pei ona saunoa le taitai itumalo, le susuga ia Tovia Aumua i le sauniga lotu na amata ai le fa’amoemoe. Saunoa Tovia, na te lē fa’aigoaina lenei fa’amoemoe o se tauvaga pese, a’o se fa’amoemoe e toe fa’ai’ila ai taleni ma agavaa a alo ma fanau ua amata ona fa’atalale i ai.

O le susuga ia Seumanu o se tasi o alo o le atunuu ua iloga i tulaga tau musika, sa tapenaina le pese autu ma o ia foi sa gafa ma le fa’amasinoina o le tauvaga. Na fa’ailoa e le susuga ia Seumanu i lana saunoaga autu i lea afiafi, ua 25 tauvaga eseese sa fa’amasino ai i tausaga ua alu, a’o lana maitau e uiga ese lenei tauvaga i tapenaga a aufaipese taitasi. O le mafua’aga foi lea o le faigata o lana galuega, aua e taifoliga tutusa uma le matagofie o tapenaga a aufaipese. Ui i lea, sa i ai lava nai eseesega laiti na mafai ona fua i ai lana fa’aiuga.

Tulaga Muamua - Mangere East

Tulaga Lua - Tutusa Saint Paul Otara & Papatoetoe

Tulaga Tolu – Tutusa Manurewa, Papakura & Magere Central.

Na fa’aiu le fa’amoemoe i lea afiafi i le taumafataga felanulanuai na tapenaina e autalavou taitasi. I le maea ai o le taligasua, ona saunoa lea o le susuga i le Konevina e fa’aleo le agaga fa’afetai ma momoli fa’aaloaloga mo le susuga i le alii Fa’amasino, e tusa o le galuega sa fitaituga i ai. Na saunoa foi le susuga i le Konevina e fa’afetaia le susuga i le Sea malolo, le susuga ia Suiva’aia Te’o ma le paia o le aiga alii ona o le ipu matagofie na tapenaina mo le tulaga muamua o le tauvaga. E le’i fa’agaloina Afia i si ona vao, i le agaga fa’afetai o le susuga i le Konevina i le paia o le nofo a Peresetene ma Autalavou taitasi ona o le amanaia ina o le ofisa ma le laulau i le tapenaina o lenei fa’amoemoe.

So’o se fa’amoemoe lava a le au Kerisiano tatou te amata i le Atua e tatau foi ona fa’aiu i le Atua. Ma o le taualuga lea o lea afiafi ina ua tulai le Tama o le Itumalo, le susuga ia Tovia Aumua i lana saunoaga mulimuli ma tāpunia aloai’a ai le fa’amoemoe o Autalavou Manukau i le tatalo fa’aiu.