Hokosia e Ta’u 25 ‘o e kāingalotu Tonga ‘o Napier
Pea ko e fakakoloa foki e kātoanga ko e faingamālie 'a e Faifekau Sea mālōlō Rev Dr 'Epeli Taungāpeau ke ne fai e malanga fakamanatu ni. ‘I he ko ia na'ane fakahoko e visone ni 'o kamata ai e 'uluaki malanga faka-Tonga he 'aho he falelotu ni he 'aho 30 'Akosi 1998.
Na'e fakahoko foki e malanga ni fakatahataha e kau palangi mo e kau Korea mo e SUTT 'o Hasting he malanga mo e Sakalameniti pea hoko atu aipe ki he talitali 'e he ongo setuata mo e kaingalotu ha talitali ma'u me'atokoni ke faka'ilonga'i 'aki e maka maile Siupeli Siliva 'o e fai'angalotu ni.
Pea ko e fakakoloa lahi foki mo e langilangi'ia e katoanga ni ko e me'a ai e Palesiteni Malolo 'o e Siasi Metotisi 'o Nu’u Sila, Rev Dr Lenny Firth, Faifekau Pule Napier Methodist Parish, Rev David Harding.
Pea ko e fakakoloa foki e tauhi e kaingalotu ni ko e tauhi 'e he Setuata pe na'e fili he 1998 ke ne tauhi e kainga ni Ko Fatongia 'Ofa mo 'Oliva 'Ofa pea ko kinaua pe 'eni 'oku kei setuata lahi ka e tokoni ki ai 'a 'Onani Lei mo Naomi Lei mo e si'i ngaahi famili 'o e siasi neongo kuo tōtau hono ni'ihi.