NA JISU NI TUCAKE TALE MAI NA MATE ENA LOMA NI NODA TAUBALE

E yavutaki nai lalakai ni vula oqo ena ena kosipeli nei Luke 24 ka toqai toka e cake. E volai toka ni dua na taubale, e dua na veitalanoa titobu me baleta na veika e kuruseta na vanua ko Jeruisalemi kei na nona digitaka na Karisito ni tucake tale mai na mate me vakatakilai koya vei ira era sa dinata ka digitaka me vakatakila kina na veika e dina ka taucoko me baleti koya kei na nona matanitu vou.

Ena tikini lesoni oqo, e tautaunaki na bibi ni noda taubale vata kei Na Karisito ka veitalanoataka na veika e dina me baleta koya. Nai matai sai koya na kauwai nei koya ka a tucake mai na mate ko Jisu na Karisito me mai taubale vata kei rau na rua nai tokani ki Emeo.

Nai karua ni ka sai koya na gauna Va-Kalou e digitaka me basika vei rau nai tokani oqo ka sega ni yalani koya na gauna kei na vanua e nanuma, e yaco na loma ni Kalou enai tuvatuva sei lakolako koya. Nai katolu sai koya ena loma ni taubale lomatarotaro koya e curubotea ko Jisu ka laki oka me tiko ena loma donu ni veitalanoa koya.

Na taubale kei na veitalanoa nodrau nai tokani mai Jerusalemi kei Emeo oqo e cavuta ko Luke ni yaco tiko ena yakavi ni Siga ka tucake mai na bulubulu ko Jisu. E matalia ni digitaka na kosipeli ni tukutuku oqo ko Luke me dolava na matada vakayalo ko koya me vakatakila ni tiko na gagadre Va-Kalou me dau salavata kei ira era loma tarotaro ena veika e yavalata na lotu kei na kena vakabauta ka vakatakila na veika e dina ena kena gauna va-Kalou koya.

E vica na yavu e digitaki me noda lewe ni noke ena bula ni tuabale vakayalo oqo kei na vaqa erau cau kina na lewe rua oqo. Ni cavuti na taubale, eda vakalesui ena volatabu vou ena Marika 16:3 e dua na mala ni vosa e cavuti ni “ratou sa cavutu me ratou lako” na marama me ratou lako kina bulubulu e ratou taroga e vica na taro lelevu; O ceii ena vakaqiqica tani na vatu?

Ena tikina oqo e via vakadeitaka ko Marika ena taubale kei Jisu na Karisito, e dau sauma na taro lelevu me baleta na vatu, na kena vakaqiqici tani, na kena laurai nai naki ni taubale kei na sou vakamataka koya.

O rau nai tokani taubale e Emeo e cavuta ko Luke 24:14-15 “a rau sa veivosataki taka na ka kece oqo sa qai yaco”… Ia ni rau sa veivosaki tiko ka veitarogi, sa toro voleka ko Jisu ka lako vata kei rau”. Oqo e dua na mata ni moto gatagata ni kosipeli oqo sai koya ya na nona dau toro voleka na Kalou ena gagadre ni tamata me dau vakila na dina ni veika e yaco enai nonai tosotoso vou koya.

Ena loma ni bulubulu e voqa kina na domo Va-Kalou dou kakua ni rere, dou sa vakasaqarai Jisu na kai Nasareci, o koya ka a lauvako ena kauveilatai, sa tucake ko koya; sa sega eke, raica na tikina era a vakotora kina. Sa tucake na Karisito kei Vakabula ni vuravura oqo. E da sa sureti ena yalo e vakabauta me da tucake vata kei na Karisito ena loma ni vesu kei na veibulubulu qiqo eda buluti tiko kina.

E totoka na vakadewa nei Luke oqo baleta ni kauwai ena noda taubale na Luve ni Kalou. Na taubale vakaoqo e rawa ni da vakaveiwekataka kei na noda sasaga ni toso ena vanua eda sa mai tu kina oqo. Na sasaga ena toso ni lotu, na vulika, nai naki ni vuvale ena bula torocake kei na bula e sautu. Oqo e oka toka ena taubale oqo. E veitalanoataki e loma ni vuvale, a tautaunaki ena noda taubale vakavuvale ka bibi me da ciqoma ni dau rogoca na ka vakaoqo na Kalou vakaikoya ka toro voleka ka lako vata kei keda.

Ena nodai tosotoso ni vakabauta vou oqo, sa bibi dina na cavui kalawa me da toso ki liu, taroga eso na taro bibi vakakoya, ka cavuikalawa ena vakabauta na dina ni tucake tale mai na mate na Jisu na luve ni Kalou. E nonai tavi na Kalou na vakaqiqica tani na veivatu eda sogolaki tu kina. Ni da sa cavuta na yavada me da toso ena bula ni vakabauta ena vakaqiqici tani na veika e vakalatilati tu e matada ka na sereki mai na dina e toka e yaloda ka na dolavi na matada vakayalo me da raica ka sotavi Jisu ena drake duidui e da sota kaya.

Ena taubale oqo e uto ni veitalanoa na nona tucake mai na mate na Mesaia kei vuravura. Oqori na lewe ni noke e dodonu me Tawana na matavura ni noda veitalanoa. Ei tukutuku matanidavui ena loma ni vanua oqo. E yavalata na vanua, na lotu kei na matanitu ena gauna koya. E tukutuku dina ka na seg ani vakadruka koya ko mate, se nai bulubulu se dua na ka ena dela ni vuravura oqo. Era na druka kece ka vakavurumemea taki na veika e lasu kecega ka na duri ka tucake na dina levu oqo, ni ko Jisu na luveni Kalou, nai lumuti mai lagi meu sevu ni mate kei na tucake tale mai na mate ka yavu ni noda lotu kei na kena vakabauta.

Ena vula oqo ko Me, sai tautau ni Wasewase ko Viti kei Rotuma ena loma ni lotu me da taubale ena dela ni vakabauti Kalou, me veitalanoataki na veika e dina ka basika kina na toso ki liu, kei na noda tugana e lomada na kauwai Va-Kalou ena noda taubale kei na noda sasaga ke ravita na uto ni tucake tale mai na noda Vakabula ka Kalou dauveitorovi voleka ena keda maliwa, ka liutaki enai lakolako ni vakasaqara na dina ni Kalou.

Ko Paula ena 1Korinica 15:13-15 “ Ia kevaka sa sega ni tucake tale ko ira na mate, sa qai sega ni tucake tale mai na Karisito, Ia kevaka sa sega ni tucake tale mai na Karisito, sa qai ka wale na neitou vunau, a ka wale talega na nomudou vakabauta. Ia keitou sa kune kina me daulasulasu,ni keitou sa tukuna na Kalou; ni keitou sa tukuni koya na Kalou, ni sa vakaturi Karisito cake mai,ia ka segani vakaturi koya cake tale, kevaka sa sega ni tucake tale ko ira na mate.”