Na’e talitali lelei ‘e he tangata’eiki Faifekau Pule, Vaikoloa Kilikiti, ‘aki ‘a e lotu fakafeta’i ‘o Tali-Ki-Vaha ‘i he ‘ofisi e Vāhenga Ngāue ‘Aokalani mo Manukau ‘i he pongipongi Mōnite 10 ‘Okatopa, 2022.

Ko e fetongi foki ‘eni ‘e Tali-Ki-Vaha ‘a e Tauhi Pa’anga mālōlō, Kalolo Akoteu, kuo ne retire hili ‘a ‘ene tauhi e pa’anga ‘a e Vāhenga Ngāue ‘i ha ta’u ‘e uofulu-tupu. Na’e talamonū mo fakamālō kia Kalolo ‘i he ngāue lelei he ta’u lahi pea malu ‘a e pa’anga e peulisi.

‘Oku lau tapuaki mo monu’ia ‘a e Vāhenga Ngāue ‘i he ma’u ‘o Tali-ki-Vaha mo ‘ene taukei ngāue faka-tauhi tohi he ngaahi ta’u lahi ko e Chartered Accountant pea hangē ko 'ene talaloto "Ko e faingamālie 'eni ke ngāue 'aonga'aki 'a e 'ilo mo e taukei 'oku ou ma'u ke ngāue'aki ma'ae siasi."

Ko e hū mai 'eni 'a Tali-Ki-Vaha ki ‘ofisi ke hoko atu ‘a e ngāue mo hono tauhi ke malu mo maau ‘a e ngaahi pa’anga ‘oku falala mai ‘a e ngaahi siasi fakakolo ‘i ‘Aokalani mo Manukau ke tauhi atu mei ‘ofisi.

‘Oku faingamālie ‘a ofisi mo ‘atā ki ha taha ‘oku fiema’u tokoni he Mōnite ki he Falaite ‘e ‘i ai ‘a e Tauhi Pa’anga, tukukehe kapau ‘oku ne fakataha ki ha feitu’u kehe.

Ko Tali-Ki-Vaha foki ko e sekelitali lahi lolotonga ia ‘o e fai’angalotu Fakafeangai Mā’oni’oni, Onehunga, pea ko e ngaahi ta’u lahi ‘a ‘ene tauhi mai ‘a e lakanga ko ia.

‘Ikai ngata ai, ka ko e Tokoni Tauhi Pa’anga Lahi ia ‘a e Vahefonua Tonga Aotearoa.