Au sa vakabula raraba yani kina loma ni Wasewase ko Viti kei Rotuma E Niusiladi, ni bula nai Talatala Qase, dou bula talega na veitacini vaka I Talatala, turaga na Qase Levu Vakacegu Ilaitia Tuwere, kemudrau saka nai Talatala Qase Vakacegu, Mikaele Yasa kei Talatala Peni Tikoinaka, kei kemudou nai tokani vaka I Talatala kei na kena I vavakoso lomani.

Au gadreva mei takitaki vakayalo mai nai Lalakai ni Wasewase nai ulutaga levu ni vula vakalotu eda donuya tiko qo, NA PENITIKO, ka dusia na Penitiko se na siga ni Penitiko, NA NONA LAKO MAI NA YALOTABU ena siga oya e Jerusalemi me qai vaka tucaketaki ratou na tisaipeli me ratou vunautaka nai tukutuku Vinaka I Jisu Karisito {the gospel of jesus christ} kei na nona Veivakabulai {his salvation}. E vica na ka e tukuna nai Volatabu ena nona lako mai na Yalotabu, ia au gadreva meu tekivu ena veika ka dusia ko Jisu ena tikina ka toka I cake oqori, NA YALOTABU NA VUNI KAUKAUWA. E tukuna toka ike ko Jisu ni na lako mai na Yalotabu ka na qai solia vei ratou na kaukauwa me ratou qai lako yani ki Vuravura ka vunautaka nai Tukutuku Vinaka I Jisu kei na nona Veivakabulai. E dusia vei keda ni da gadreva, tabu saka yani na tamata na kaukauwa ni Yalotabu me qai rawa nida tucake ka qarava yani na veitalaki levu ka veitalaki kina ko Jisu. {the great commission – MACIU 28:19 – 20} Eda na sega ni rawa ni qarava na Veitalaki Levu qo ena kaukauwa ga vakatamata, baleta ni tiko raviti keda talega ena siga kei na bogi, na tevoro ko Setani kei na nona mataivalu butobuto. {1 Pita 5:8} Ia na lako mai ni kaukauwa ni Yalotabu qo e sega ni tu ga ka lako mai. Ena gadrevi na noda laki tiko wawa e Jerusalemi me yacova ni lutu mai na Yalotabu ka soli na kaukauwa ni veiqaravi. Ia na nona lako mai na Yalotabu kei na nona soli kaukauwa, au gadreva meu wasea kina e tolu na kena yavu ni ka e koto ena rarama ni talanoa oqo kei na kena lesoni e tolu oqori mei takitaki vakayalo mai nai Lalakai ni Kalou ena I Wasewase. Nai matai, NA WAWA ENA CAKACAKA VAKA LOMAVATA. Nai karua, NA LAKO MAI ni yalotabu KEI NA KA E KAUTA MAI, Na kena I katolu, NA NONA VEITOKANI NA YALOTABU.

NA WAWA ENA CAKACAKA VAKA LOMAVATA{waiting & working wholeheartedly in togetherness}

Na vosa nei Jisu ka koto ena lesoni I cake oqori, a vola talega ko Maciu ena Maciu 28:19 - 20, ka qai vakamatatataka tale ko Luke ena Luke 24:47 - 49 me ratou laki waraka na Kaukauwa oqori e Jerusalemi ka koto vata na kena cakacaka. Eda raica ena Cakacaka 2:1 - 4, kei na Cakacaka 1:12 – 14, ni koto kina na bula ni wawa oqo ka sega ni toka wale ena nodratou sa lomavata ena masu kei na lolo. Nai matai ni dusidusi ni wawa ena cakacaka vaka lomavata, e dusia ni gadrevi na kena lutu mai na Yalotabu kina noda bula, meda bula ena bula ni wawa ena cakacaka vaka lomavata ena lolo kei na masu. Na lolo kei na masu ka tu kina na vei vakatakatai vakayalo ena bula ni vakatutusa, veivosovosoti, veiciqomi, veiwasei ena Vosa ni Kalou kei na kena bulataki me rawa ni savasava tiko kina na bula ka galala na nona curu mai na Yalotabu. Ni cavuti na Lomavata, e kena I balebale me tekivu sara ga vei keda yadudua ena kena vakanauluvata na Lomada, na Yaloda kei na Yagoda ena noda qarava na cakacaka ni wawa oqo. Me kakua ni duidui tu na tolu na ka oqo, me tu tani na yalo, ka tu tani yago, ka tu tani lomada, sega me ratou tu vakalomavata ka vakanauluvata ena cakacaka ni wawa oqo, me qai sema vata kei ira tale na tisaipeli yalodina ka me qai yaco me taucoko na lomavata ka lutu na Yalotabu. Oqo na ka e dau yaco vua e dua ni sa yavalati ena Yalotabu ka solia na nona bula vei Jisu, e vakanauluvata kece na lomana, na yalona kei na yagona me solia na nona bula, sa qai lutu mai na Yalotabu ka mai toka vua. Ni sa rawati nai matai ni ulutaga oqori, sa na qai rawa me davo mai nai karua ni ulutaga :

Na lako mai ni yalotabu kei na ka e kauta mai{the coming of the holy spirit &what he brings}

Ni sa davo vinaka nai matai ni ka e tataunaka ko Jisu vei iratou na tisaipeli ka koto ena matai ni ulutaga, sa na qai rawa me lutu mai na Yalotabu ka cakava na nona cakacaka. E rua na ka e kauta mai na Yalotabu ena nona lako mai ka mai curu vei ratou na tisaipeli ena siga ni Penitiko, Nai matai, na nona mai solia nai solisoli ni yalotabu ka kena I karua na nona mai vakararamataka na taledi eratou sucu vatakaya mai. {bringing gifts of the holyspirit and enlightening talents they were born with} E rua na ka oqo eda raica ena nona lako mai na Yalotabu vei ratou na tisaipeli ka yaco kina me ratou tucake ka Vunau kina ena loma koro ko Jerusalemi.Na kena soli nai solisoli ni dui vosavosa kei na kena vakararamataki talega na taledi e ratou dui sucu vata kaya mai. {cakacaka 2:3 – 4} E duidui nai solisoli e dui soli vei keda ka tu na kena I naki ni kena soli mai meda mai tiki ni yago ni Lotu I Jisu ena kena qaravi, cakacakataki ka maroroi talega na nona Lotu, ka da mai liga ka yava talega ni tukuna yani nai Tukutuku Vinaka I Jisu ena kena vakalesui na yalo mera lesu vua na Kalou. Nai solisoli oqori e kacivi keda tiko kina na Kalou meda mai vakayagataka ena loma ni nona Lotu savasava, me tubu ka vuavuai vinaka kina. Eso era soli vei ira nai solisoli ni Vunau, se I solisoli ni veivakabulai, se veimasulaki, kei na so tale nai solisoli tale eso, ia e rua nai solisoli e soli kece vei keda na tamata eda solibula ena dela ni veivutuni mai na veisolisoli duidui ka dui soli veikeda. Nai solisoli ka vakatokai vakavavalagi, the Gift to Minister & the Gift of Knowledge. He gives the power to these gifts to prosper. Nai solisoli meda wasea kina na Vosa ni Kalou {joni 15:26 – 27, cakacaka 1:7 – 8} kei nai solisoli ni Kilaka meda kila na Vuravura ka kila na tevoro kei na nona cakacaka butobuto, ka kila na ka meda cakava meda lako tani mai kina, ka vakakina na noda kila talega nai cavacava ni vuravura qo kei na ka ena tarava mai. {JONI 16:8,13 – 14} These are the common gifts of the Holy Spirit to every dedicated Christian. Ena dela ni solisoli duidui oqori, sa tu talega na nona vakararamataka na veitaledi duidui ka soli vei keda meda sucu vatakaya mai, ka meda kidava ka raica ka kila, ka vakayagataka talega kina nona Lotu. Na veitaledi lalai se levu e dui solia vei keda mai na gauna ni noda sucu, e solia me yaga kina noda bula, na noda vuvale, na noda cakacaka, na noda vuli, ia sa kena I naki levu duadua meda mai vakayagataka kina na nona Lotu savasava na turaga, ka gadrevi meda kila ni dodonu meda cakacakataka tiko na noda dui taledi e solia vei keda na Kalou me rawa ni vua, ka vua ga kina na nona lotu e Vuravura. Meda kakua ni buluta se vakamocera, de da na qai biu ki tuba meda curumi batabata ka vakasequruquru bati. {Parables of the talent - Maciu 25:14 – 30} Ena I solisoli kei na taledi ka sereki tiko oqori, ena yaga meda vakayagataka vakavinaka ena noda veiqaravi e Vuravura, ia ka vakabibi sara ga na nona Lotu Savasava na Karisito. Ni vua na noda taledi ena noda cakacakataka ka vakabibi ena Lotu I Jisu, ena tawa na ligada kina vua eda na kauta yani vua na turaga, ka na tau mai vei keda na vosa talei, tamata dina, ko sa dina ena ka e vica ga, curu kina marau ni nomu turaga.

Na nona veitokani na yalotabu – the fellowship of the holyspirit

Nai katolu ni ka bibi ni nona lako mai na Yalotabu, sai koya na nona mai veitokani kei keda. {Fellowship} Ena loma ni nona veitokani oqori, e koto kina e rua nai Wasewase ni nona veiqaravi. Nai matai, e lako mai na Yalotabu me mai noda I tokani, {joni 14:16 – 17, 26, cakacaka 1:5 ena loma ni veitokani oqori, e koto kina na nona veidusimaki, dau ni veituberi, veivakaukauwataki, veivakadodonutaki, veitaqomaki, veiliutaki, vuni ka dina, veipapitaisotaki kina noda I lakolako ni vakabauta kei na qaravi tavi e Vuravura, ka vakabibi na noda qarava ka maroroya na Lotu, kei na noda qarava na veitalaki levu ka koto ena Maciu 28:19 – 20. Na kena I karua, e lako mai me mai vakani keda se susugi keda vakayalo kina Vua ni Yalotabu me yaco me tu kaukauwa ka vuavuai vinaka. He feeds the tree of our spiritual life only with the Fruit of the Spirit so it can grow healthy and bear healthy fruits to make our Faith stronger and stronger. {kalatia 5:22 – 23} Sai koya ga oqori na ka e veivakani kina na Yalotabu, na vua ga ni Yalotabu, me rawa ni tubu vinaka ka vuavuai vinaka kina na noda bula vakayalo. Na vua ni Yalotabu, sai koya ga nai tovo ka vaka I tovotaki koya kina na noda turaga ko Jisu Karisito, ka buli koya kina me Dauniveiqaravi Yalodina ka qarava galugalu kina nai lesilesimai Lomalagi me yacova sara na mate kei na tucake tale mai na mate ena vuku ni noda lomani na tamata, nai bulibuli vakamareqeti ni Kalou Bula. Ena yaga meda dau vakarautaka ena so na gauna na titobu ni vei vua ni Yalotabu kina noda bula, na Reki, ke se tiko na bula ni daucudrucudru kina noda bula, e sebera ni tu vinaka na vua ni Daureki, ke se tiko na yalototolo, e sebera ni vua vinaka na yalomalua, ke se tiko na yalokaukauwa kina noda bula, e sebera ni vua vinaka na yalomalumalumu, ke se dau tubu vakalevu na veilecayaki kei na lomalomarua ena veigauna ni dredre eda sotava, e sebera ni vua vinaka na Vakacegu, ke se dau yavavala ka yamekemeke na noda Vakabauta, e sebera ni dei ka kaukauwa na noda Vakabauta. Sa na yaga kina meda lesuva tale nai matai ni kalawa sei ulutaga, na tiko wawa e Jerusalemi kei na kena cakacaka, ka dautagica ka guta na Yalotabu me lakovata tiko kei keda ena veigauna, ena qai yaco meda vuavuai vinaka ka tamata qaqa ka kena I cavacava nai sala mai Lomalagi. ME NODAVATA TIKO NA VAKACEGU NI TURAGA. EMENI

Kidz Korna Word Search