Taimi O Le Agai Atu O Samoa e Avea Ma Malo Tutoatasi I Le Tausaga e 1962

1880s – Malo – Amerika, Peretania ma Siamani sa iai i le Atu Pasefika ae maise Samoa.

Sa vaai Amerika i se mea e faamautu iai a latou va’a tau lea ua latou taofi mau ai nei i le taulaga o Pagopago

Sa vaai Peretania i ni laufanua poo se mea o loo nofo pologa ai le toatele o ni tagata

Ae sa naunau Siamani i ni lau eleele e ono faatupulia ai fua o faatoaga e pei o le koko ma popo e ono toe faatau atu.

1990s o le vaitaimi lea na vaeluaina ai Samoa i tulaga faapolokiki i le va o Amerika ma Siamani.

Na manumalo ai Amerika ia Tutuila ma Manu’a lea ua taua nei o Amerika Samoa.

Ae pulea ai e Siamani ia Upolu ma Savaii lea na outou soifua ma tatou ola mai o taua I lena vaitaimi o Samoa i Sisifo.

Ae o Peretania na latou pulea ia le Atumotu o Fiti.

I le vaitaimi o Siamani, sa tulai mai le tamaoaiga tele o Samoa i le popo ma taumafai ai loa le malo ina ia avea le tele o fanua, e fai ma fanua o le malo. O le ala lea na faatuina ai le Ofisa o Fanua ma Suafa i Mulinuu e pei ona iai nei.

I le vaitaimi fo’I o Siamani, sa iai le kovana e suafa ia Solf, ma na tulai mai ai se tulaga matautia lea na mafua ai loa ia le le fiafia o Tumua ma Pule ma alu ai loa le solo tete’e e taitai e le tagata e suafa ia Namulauulu Lauaki i le 1902.

Sa taua lenei solo tete’e o le Mau a Pule ma o le amataga foi lea o le Mau i Samoa.

Ina ua maea le taua muamua a le lalolagi i le tausaga 1918, sa toilalo ai Siamani ma nisi atunuu sa latou auau faatasi. Ona tulai mai ai lea o nisi o atunuu ua latou taumafai e puipuia nisi o atunuu ma atu motu o loo le mafai ona tutoatasi. Ua taua lea o le League of Nations, lea o lo’o lavea ai Niu Sila. O le ala lea o lo tatou fesootai ma le malo o Niu Sila e pei ona iai nei.

I le 1920s

Ua amata lava ona taitaiina Samoa e nisi o taitai i le Army a Niu Sila ma na oo ai lava ina le fiafia ai le toatele o tagata Samoa aua ua afaina ai tu ma aga faa Samoa moni.

I le tau faaiuiuga lava o le tausaga e 1920 o le taimi lea ua tulai mai le tagata e suafa ia Richardson e avea ma kovana, ma ua ia vaaia le vevesi o tagata Samoa e ala i solo tetee o le Mau [ua taua o le Mau Movement]

Ua matua faailoa mai lava e tagata Samoa lo latou naunau e pulea lava e latou lo latou malo.

O lenei Mau sa taitaiina e O.F.Nelson [Taisi Nelesoni] lea sa iai lona faleoloa i Apia, o Faumuina Tupua Tamasese ma isi foi tama o le atunu’u.

I le Aso 28 o Tesema 1929 na alu ai le savaliga a lenei Mau i le taulaga i Apia Beach Road ma sa faafetaui atu e leoleo o le malo lea na i’u ina maliu fasia ai le Tama a Aiga le Afioga ia Tupua Tamasese.

Ua faamauina lena Aso Toanai i le tala faasolopito o le Atunuu, o le Black Saturday, ma o iina fo’i na faamausali ai se lagona o le malo o Niu Sila ua matua liliu lava le agaga o tagata Samoa.

I le 1930

Ua amata ona amanaia e le malo o Niu Sila le leo o tagata Samoa ina ia pulea lava e ia ana mataupu fai.

I le tausaga e 1948 na sisiina ai le fu’a o Samoa i Sisifo i le maota o le malo [Robert Louise Stevenson] i Vailima. O lenei tulaga e ta’u atu ai i tagata Samoa o lea ua amanaia e le Malo o Niu Sila le agaga o tagata Samoa mo so latou Malo Tutoatasi.

I le tausaga 1950 ua amata ona faasauniuni Samoa mo lea tulaga.

Ua auina mai alo ole Atunuu i kolisi ma Univesite i Niu Sila mo aoaoga.

Ua faa tulaga tatau galuega a le Malo e pei o le fa’alelei atili o le tulaga o faatoaga.

Ua saunia tulafono e talafeagai ma le soifuaga faa Samoa

Ua galulue faatasi Loia ma tamalii o le atunuu e tuu faatasia le Faavae o le Malo o Samoa.

I le 1960,na tapena ai loa le Ulua’i Constitution [FA’AVAE] a le atunuu ma sainia ai loa e le Malo Aufa’atasi.[United Nations]

I le 1962: Na avea ai loa Samoa ma uluai atumotu o le Pasefika ua Tutoatasi.

Na filifilia ai le Afioga ia Malietoa Tanumafili Le Lua ma le afioga ia Tupua Tamasese Meaole e avea ma Ulua’i “Ao” o le malo.

O le afioga ia Mataafa Mulinuu na filifilia e avea ma Uluai “Palemia” o le Malo Samoa.

Brief History of Samoa after Independence

Talaaga o Samoa ina ua mae’a ona Tuto’atasi

1963: Maliu ai Tupua Tamasese i le aso 5 o Aperila, ae tauave mai ai loa e Malietoa Tanumafili le Lua le tofi Ao o le Malo.

1970: aso 28 Aukuso avea ai Samoa ma sui o le Malo o le Taupulega a Peretania [Member o le Commonwealth.]

1976: Avea ai Samoa ma sui o Malo Au Fa’atasi [United Nations, ma suia mai ai loa le igoa ia Samoa ae ua le o toe Samoa i Sisifo.

1990: Pasia ai le Referendum e palota le 21 tausaga.

1997: Na fa’atua aloaia ai i fa’amaumauga e tusa ma le fa’avae, le fa’aaogaina o le igoa Samoa ae le toe Samoa i Sisifo.

2002: Aloaia ai le fa’atoesega a le Malo o Niu Sila ia Samoa

2007: Maliu ai Malietoa Tanumafili le Lua, filifilia ai loa Tuiatua Tupua Tamasese Efi e avea ma Ao o le Malo Samoa.

2009: aso 9 Setema na suia ai itu o le auala e malaga ai ta’avale.

Aso 29 Setema, na a’afia ai Samoa i le tsunami, na maliliu ai le to’a 148 i Samoa, 34 i Amerika Samoa ma le to’a 9 i Tonga.

2011: Aso Faraile 30 o Tesema, na suia ai le aso i Samoa ma ua aso tutusa ai loa ma Niu Sila fa’apea Ausetalia.

2012: Fa’ailoa ai le 50 Tausaga talu ona Tuto’atasi ia Samoa.

Avea ia lenei avanoa tatou te Tutula’i faaaloalo ai mo sina taimi. e manatua ai i latou uma sa asa ina le gasu aua si o tatou Malo Tuto’atasi lea ua tatou maua ai nei le Sa’olotoga ma le Fa’amoemoe mo au ga tupulaga i le lumana’i.

I le tusi o Teuteronome i le mataupu e 8 a’o lona fuaiupu e 2, o lo’o fa’apea mai ai

“ Ia manatua Ala uma na ta’ita’i ina mai ai oe e le Ali’I lou Atua”.

In the Book of Deuteronomy 8 verses 2, it says

“Remember how the Lord your God led you”

O le finagalo o le Atua ia nonofo faatasi lana fanau.

Ia tasi le faamoemoe, tasi le talitonuga, tasi le taunuuga, ia maua le fealofani ma ia alolofa i le Atua, ia alofa foi le tasi i le tasi.

O le lagona foi lena sa ia Papelu, aua ua tasi la latou gagana, ua galulue fa’atasi, ma ua tasi fo’i lo latou talitonuga.

Paga lea, ua avea lea lagona ma mea ua tupu ai so latou manatu,

ua tatau ona latou faia se Aai ma se Olo ia oo i le tumutumu i le lagi.

Ona afio ifo lea o le Alii ma silasila iai, ona fetalai atu lea o ia, ua lelei ua tasi le nuu tasi le gagana, ae o maia ua tatau ona faa eseeseina a outou gagana.

Ua tau faaletonu manatu o tagata i lea fetalaiga a le Atua aua o lea ua latou faatauaina la latou gagana, atoa ai ma lo latou fia soifua tutoatasi.

Petai, e leo le finagalo atoa lea o le Atua.

O lo latou soifua tutoatasi, ua mafai ai ona latou fausia ni pa a’e gata i o latou loto.

Ua le mafai ai ona alofa atu le tasi i le tasi.

Ua tupu ai o latou manatui, o le Atua ua na’o mo i latou lava

Ua latou manatu ai e sili atu la latou gagana poo la latou Aganuu i lo isi o latou uso a tagata.

Ua le mafai ai ona latou maua le agaga moni o le maliu ma le toe tu o Iesu.

Ona o latou manatu faapito.

Afai la o le finagalo lea o le Atua ia Papelu, ae pe faapefea la ia Samoa ma lona Tutoatasi.

Atonu e tau talafeagai foi le tulaga i Papelu ma si o tatou atunuu.

Ona o le faigata sa faafeagai ma si o tatou atunuu ae maise o tatou auga Tama ma Tina ua logomau mai nei i Tia. O le ala lea o lo latou naunau atu ia maua se malo Tutoatasi aua se to’afilemu o le Atunuu.

Peitai e oo mai lava i lenei vaitaimi, o loo faamoemoe malosi tele lava si o tatou Malo i atunuu mai fafo e fesoasoani atu mo le atina’e ina o lona tamaoaiga e ala i tupe.

Fai mai le Tusi o Teuteronome:

“Ia manatua ala uma na ta’ita’iina mai ai oe e le Ali’i lou Atua”

O lona uiga e tatau lava ona maua se taimi po’o se avanoa tatou te tomanatu ai:

1.Ia a tatou Fanau

2.I o tatou Aiga

3.Ia tatou Ekalesia

4.Fa’apea si o tatou Atunu’u

I le Alofa Fa’asoa ma le Alofa Laveai o le Atua.Ae maise lona Mana Fesoasoani, lona Mana Fa’amalolo,lona Mana Fa’atonu folau fa’apea lona Mana Fa’amanuia sa ta’ita’i ina ai si o tatou Atunu’u peleina i le tele o Tausaga ua mavae.

O lo’o fa’amanatu mai, e tusa lava po’o a mea tele ua tatou maua, po’o le tamaoaiga ua tatou aeae ai nei i Faleseu, e ao lava ona tatou fa’afetaia le Atua e tusa ma lana fa’asoa ma lona alofa Tunoa.

O le mea lena na misia e Isaraelu lona nu’u. Na galo ia latou, i nei tausaga e 40 se savalia ai le vao tu’ufua, e le’i afaina o latou laei sa puipuia ai o latou tino, e le’i afaina fo’i o latou aao sa savavali ai. Ua avea ia tulaga ua galo ai ona fa’afetaia le agalelei o le Atua.

O se fa’amanatu fo’i lea mo Samoa ma ona tagata i lenei tausaga ma aso uma, afai ua fai mai lana “Tagavai” Ia Fa’avae i le Atua Samoa, o lona uiga e ao lava i ona tagata nu’u uma ona nofo tatalo i le Atua e tapuaia ai faiva ma tiute o lo’o latou feagai ai.

E tatau fo’i i Ekalesia ma aiga ona fa’afetaia le Atua e tusa ai ma le tele o fa’amanuiaga ua latou maua ina aua le atina’eina o lana galuega paia.

Alofa atu.