E sotava na gone Turaga ko Jisu Karisito, edua na veisau mai na ulunivanua, mai na veivakabulai keina vunautaka na Matanitu Vakalomagi. Sa tekivu na nona vakavakarau me gole yani ki Jerusalemi. Me vakarau curuma, nai lesilesi kina nona veitalai.

Au vakabauta oqo na veisau e vinakata na Kalou, meda lako curuma ia ena yacai Jisu Karisito, ena nona veivuke keina veituberi na Yalotabu. E vinakata na Kalou meda tubu cake vakayalo, oqori na cakacaka ni veivakalotutaki, ni veituberi ena wili volatabu, masumasu keina veitokani vakalotu.

Eda sarava kina edua na lakolako vou, erau tiko na gone Turaga ko Jisu Karisito keina Yalotabu dau cakacaka. E sega baleta ni sa papitaiso, ia ena noda tubu vakayalo ena nona wilika na Vosa ni Kalou ka tugana e lomada me tei ka ka’dre. Oqo sa ka bibi ena bula Lotu Vakarisito ena noda via kila nai tukutuku meda cega ka wilika tiko tukutuku vou ka bula. (II Koronica 5:17)."Ia, kevaka sa tu vata kei Karisito edua na tamata sa qai buli vou, sa lako tani na veika makawa, sa yaco me ka vou na kecega"

Na bula Vakayalo e solia na vei keda na kaukauwa ni veibuli ni Kalou keina noda bula. Ni rau sota vakayalo vaka-Kalou e lomada, e tubu ni duabau Vakalou. Eda sa tekivu meda bulataka na lagilagi keina serau savasava keina dina ni Kalou bula. Baleta na veisau edau kauta na yalomatua keina railesu titobu.

Na sucu mai nei Karisito, ena sa tadu mai vakatamata ki vuravura na Kalou bula, sa mai vakayacora na nona cakacaka keina veivunau eso. Na veitalanoa mai na ulunivanua sa caka kina na veitataunaki, ki nai golegole ki Jerusalemi me laki vakayacora na loma ni veitalai ni Kalou. E sega ni tu vakasuka se kaya ena sega ni rawata. Ia sa gole ga yani, ena vakarorogo keina nona veivakarautaki na Yalo ni Kalou.

Na veisau e mai vakaraitaka tiko na gone Turaga, eda sarava kina na lagilagi ni Kalou, ena noda bula yadudua. Baleta ni da sa doudou, meda boletaka nida veisau ena vuku ni yaca nei Jisu Karisito. Sa yali yani na rere kena veilecayaki, baleta ni veiliutaki keda edua nai vakarau meda tu doudou ka valataka na dina keina dodonu, bucina na galala, me vakakotora edua na noda nuinui dei ka dina ena vei Siga ni mataka.

Na veiwekani, sa gauna ni veisau, vata kei Kasirito. Na cava tale eda sa waraka tiko. Na nomuni tavi mo vakadinadinataka na nona veivakabulai baleta nai valavala ca. Roma 10:9 - Na nomu vakatusa ena gusumu ka vakadinata ena vu ni lomanu taucoko ni sa luve ni Kalou ko Jisu Karisito, ka mate ka tucake tale. Oqori sa noda vakaidinadina ka meda vakatusa, na noda caka cala.

Au sa na sureti keda meda raica lesu, ena vakatutusa, ka vakadinata ni da sa tamata valavalaca. Oqori, ena qai vakavurea na vakabauta keina dina, na Yalo doudou, ni sa bulia e lomada, ko Jisu Karisito, me vakakila kina na galala keina veisau e rawa ni vakayacora ko koya. Eda sota vata keina nona veisureti, veisusu keina tara cake na loma ni Kalou vei keda. Oqo sa'ka na veitikina e cavuti koto Paula ena Wase 4 ni Roma.

Sa lauvako oti na Turaga, baleta keda. Sa vo ga o keda, meda soli keda taucoka, yaloda, yagoda keina lomada vei Karisito. Baleta ena va na mataqali bula eda kilai kina - o iko vei ira na lewe levu, o iko vei ira na wekamu, o iko vei watimu, o iko vei iko ga. E duidui kena na kedai yaloyalo eda vakaraitaka, ia e mata ni Kalou e duabaga. E sega ni dua na ka e vunitaki. "Sa gauna ni Veisau ena Ligai Jisu"
"Me ceguva ka vakalougata na veivosa keina tikina eda sa rogoca ni kua"