Sinoti Samoa Celebrate White Sunday

*O le ala tumati’e lea o le agaga fa’afetai a’e i le Atua ona o avanoa, sa mafai ai ona fa’atauaina nisi o fa’amoemoega tauatia’e mo a tatou Autalavou ma Tupulaga . O le masina o Aukuso i le mae’a ai o le Sinoti fa’a-le-tausaga a le Sinoti Samoa i Niu Sila nei, na fa’atinoina ai le polokalame o le Aganu’u a le Autalavou a St Paul Metotisi i Otara. O se avanoa sa a’oa’oina ai e le Autalavou ma Tupulaga le talitonuga; E lalago fa’atasi le feau o lo’o afifi i talatu’u a le atunu’u, ma le feau a le Talalelei, olo’o tausisi iai le soifuaga ma lo tatou ola fa’ale-agaga. Ma e tolu tala sa a’oa’oina ma fa’atinoina e le Autalavou Tupulaga;-

A.Tala i le Fa’atolotologatama, na afua mai ia Tau’ili’ili ma ana masiofo e to’atolu o;- Taufau le tina o Tupuivao; Na’umanaia le tina o Vaovasamanaia; ma Sualupe le tina o Toilolo.

B.Tala ia Velova’a; o le afuaga lea o se tasi o muafetalaiga masani e fa’apea;- ‘Ua ou tu nei i siui ae ou sausau i moana, e pei o le fetalaiga ia Velova’a.’ O se tasi o muafetalaiga ua a’oa’oina ai le fanau Tupulaga mo le folafolaina o ni fa’aaloaloga i taimi ma aso fa’apitoa, e fa’apei o ni taligamalo ma ni fa’atasiga fa’apitoa e pei ona masani ai.   

C.Tala ia Vaea ma Apa’ula. O le lagaina o le toilalo o Apa’ula e ‘Va’atausili’, le uso o Vaea lana manamea, ina ua tagatavaleina ‘Tuisavalalo’ si ana tama pele i le agaga. O le ata o le talilumafale a le Atua i le fanoga o lana tagata, na Ia auina mai ai lona Alo Pele e to’atasi, o Iesu Keriso, e laga le toilalo o le lalolagi mai le agasala.     

O Iesu lava na fetalai, ‘tu’u mai tamaiti e o mai ia te a’u, aua le vavao ia te i latou, aua e fa’apei o i latou nei, e o i le Malo o le Lagi.  *O le ‘Lotu a Tamaiti’, o le tasi lea o ‘AsoSa’ e sili ona fa’atauaina e le tele o Ekalesia Kerisiano i le pasefika, ua le gata i Samoa, ae ua fa’apea foi i atunu’u i fafo e pei o Niu Sila nei ma Ausetalia.

Ma e ui ina ua ‘ese’ese ‘AsoSa’ e fa’amanatuina ai e nisi Ekalesia, peita’i e tasi lava le auga-o-aute, o le ‘fa’atauaina lea o alo ma fanau, i totonu o aiga ma nu’u, aemaise totonu o Ekalesia ma le Komiunti lautele, e pei ona taula’i le va’ai i le tau fa’aitiitia o sauaga i totonu o aiga.

Ma o nai va’aiga ia ua pu’ea i ata o le AsoSa o Tamaiti i totonu o St Paul i Otara. O le tausaga lenei o tala ma aitema a aiga. Ae talitonu sa maua se AsoSa o Tamaiti manuia ma le fiafia i totonu o Matagaluega uma o le Sinoti Samoa.   

Blessings!.