O lea ua tini pao le uto e pei o le faiva i vai, ua sili ofe fo’i tautai matapalapala e pei ole fetalaiga i le aiga-tautai e ala i le fa’amoemoe sa lupe o nisi o le aufaigaluega; lea ua mafai ona fa’aulufale aloia i o latou nu’u e tusa ai ma le Tusi Tofiga a le Ekalesia.

O le aso 15 o Ianuari o le tausaga nei, sa fa’ataunu’uina ai le sauniga o le Induction mo le fa’aulufaleina o le susuga i le fa’afeagaiga ia Faletagoa’i ma le faletua ia Malaeniu ma le aiga i le Itumalo i New Plymouth. Sa fa’atumulia lea sauniga mamalu i le paia o aigagalua, tainane o le Itumalo i New Plymouth. Sa ta’ita’iina lava e le afioga i le Sea, a o le susuga ia Rev. Falaniko Mann Taito sa feagai mo le tomatauina o le ali’i faifeau ma le faletua, e ala i le lauga o le aso fa’apea le Itumalo aua le latou galuega fou. E ui lava sa fa’amalumalu mai ao-pogisa i lea fa’amoemoe ona o le tu’ua o le malo i le afioga i le faletua malolo-manumalo ia Ela Isaia, peita’i sa le aveesea ai le matagofie o le fa’amoemoe mo le susuga i le Tausi Itumalo, le faletua ma le nofoaalo.

Ina ua mae’a le sauniga ona liliu ane lea o ala o le lupe i le taumafutaga na tapenaina e le Itumalo, ae taualuga i fa’aaloaloga sa liuliu ma fa’afao iai aao o le paia o aigagalua ma le susuga i le Tausi Itumalo ia Rev. Faletagoa’i ma le faletua ia Malaeniu.

O le susuga ia Faletagoa’i sa galulue muamua ma le faletua ia Malaeniu ma le nofoaalo i le aulotu i Oratia i le Itumalo Aukilani. O le Koneferenisi o le 2021 na aumai ai le Tusi-Tofiga a le Ekalesia e si’itia atu lana auauna i New Plymouth o le Tausi Itumalo.

O le aso 23 o Ianuari sa fa’ataunu’uina ai le sauniga o le Induction o le susuga ia Rev. Sioa Letalu ma le faletua ia Ruanna mo le fa’aulufaleina aloaia i le Matagaluega i Manurewa. O le malumalu tapua’i i Papakura sa fa’ataunu’uina ai lenei sauniga taua. O le tama’ita’i Sea lava sa feagai ma le ta’ita’iina o le sauniga a o le Tausi Itumalo Aukilani ia Paulo Ieli sa feagai ma le upu folafola o lea afiafi. Sa molimauina e le paia o aigagalua, tainane o sui mai Itumalo Manukau ma nisi o le aufaigaluega sa mafai ona auai.

Na taualuga fo’i lea afiafi i le taumafutaga fa’atasi ai ma fa’aaloaloga mo matua o le Sinoti ma le aufaigaluega ma faletua na tapenaina lava e le Matagaluega Manurewa.

O le susuga ia Sioa ma le faletua ia Ruanna, o lo la nu’u muamua Manurewa talu ona a’e i fanua le soifua a’oa’oina i le Kolisi Fa’afaifeau a le Ekalesia.

O le upu moni e le mafai e upu o le gagana ona talatala le taumasuasua o le agalelei o le susuga ia Faletagoa’i ma le faletua ia Malaeniu, tainane le susuga ia Sioa ma le faletua ia Ruanna fa’apea Matagaluega ma nai o latou aiga, e ala i osigataulaga e pei ona faia mo matua o le Sinoti fa’apea le aufaigaluega ma faletua. E sasala le nanamu o a outou osigataulaga, ma ua mautinoa ua fa’afofoga le lagi i le agaga fa’amalieina o le afioga i le Tama’ita’i Sea ma le fetalaiga ia Muaimalae, fa’apea le vasega o le aufaigaluega ma o latou faletua. Ioe fo’i le taofi ua mae’a tulei saunoa fa’amanuia atu le afioga i le Sea e tusa ma lo outou agalelei. Fa’afetai, fa’afetai lava.

Ia sagai ane ‘ai o le tai ma fa’atumuina e le Atua lo outou soifua auauna i lona tamaoaiga aua feau ma galuega amata.

Soifua