Mafutaga Faifeau ma Taitai SOT 2025

O le Aso 9 Ianuari 2025, sa fa’amoemoe o le taimi lea e ulufale ai le mafutaga a le aufaigaluega, susuga i Tausi Matagaluega ma Taitai o le Sinoti Samoa i lana mafutaga masani (SOT) i tausaga taitasi.  O lenei fa’amoemoe sa fuafua e amata i le aso 9 ma fa’aiuina i le aso 12 Ianuari i le nofoaga matagofie i Taupo.

Peitai, e ui o se fa’amoemoe sa lupe ma umi se taimi sa tapena ai, a’e sa le mafai ona fa’ataunuuina ona o le vala’au paia a le Atua i se tasi o tina matua, po’o se tasi o toeulutaia i totonu o le matagaluega i Taeaomua, o le matagaluega o lo’o punonou ma galulue ai Matua o le Sinoti.

Ui ina ua le fa’ataunuuina le fa’amoemoe, a’e sa tatala pea le avanoa i le paia o le aufaigaluega e fa’aaoga nofoaga ua maea ona totogi ao se avnoa foi e malolo ai. O ata pei ona faailoa i luga, o fofoga lalelei lena o le paia o le aufaigaluega sa mafai ona auai, ma o le upu moni a toe tomanatu i le mafutaga i si taimi puupuu lea, e tele ni manatu ma lagona lelei sa tutupu ae ai na fa’asoa ma fetufa’ai ai le mafutaga.

Muamua, o le tēle o le taimi e malolo ma felosipi ai. E le gata i lea, a ua maua le avanoa e matamata ma silasila ai i nisi o mata’aga taua i lea foi aai o le atunuu. Lua, e fa’atupu manatu i le fetuutuunaina o le polokalame ina ia maua se aso se tasi pe lua foi e na o le felosipi ma malolo ai, a’o lei amataina le polokalame masani. Ua moni ai upu e faalogo soo ai, e le o taumafa ma mea e maua a’o le mafuta le mea sili ma le taua.

Fa’amanauia le Atua i galuega amata o lenei tausaga ua tatou savalia. Fa’atonufolau pea lona  Agaga i la tatou folauga umi o lenei tausaga se ia tatou taunuu i le isi a tatou mafutaga i le tausaga fou 2026.

Soifua

Fofoga o le mafutaga.