Sāme 27 “1 Ko Sihova ‘a hoku maama mo hoku fakamo’ui; Te u manavahē kia hai? Ko Sihova ‘a e kolo ‘o ‘eku mo’ui; Ko hai te u teteki ki ai? 2 ‘I he ‘unu kiate au ha kau faikovi ke kai hoku kakano, ‘a e fai mai hoku kau fakamamahi mo hoku ngaahi fili, Na’a nau humu pea tō. 3 Neongo ‘e nofo’i mai ha kongakau, ko hoku loto ‘e ‘ikai manavahē: Neongo ‘e tu’u kiate au ‘a e tau, na’a mo ia te u falala pe. 4 Kuo u kole meia Sihova ha me’a pē taha, ko ia pe te u kumi ki ai; ke u nofo ‘i he fale ‘o Sihova ‘i he ‘aho kotoa ‘o ‘eku mo’ui, ke siofi ‘a e faka’ofo’ofa ‘a e ‘Eiki, mo fakalaulauloto ‘i hono palasi.”

Ko Amelia Viena Moala ko e uaifi ‘ofeina ‘o e Faifekau Pule Mālōlō ‘o e Vāhenga Ngāue ‘Aokalani mo Manukau. Ko e fa’ē tōnunga, ko e kui ‘ofeina, ko e tokoua, ko e faiako mo e kaungā fononga angalelei ma’a e Siasi ‘i Tonga pea mo Nu’usila ni foki.

Hili ‘a e retire ‘a Taniela ‘i hono ta’u 65 mei he siasi ‘i Nu’usila ni, na’a na to e foki mo Viena ki Tonga ‘o hoko atu e ngāue pea na toki mālōlō mai ki ‘Aokalani he hokosia ‘e Taniela hono ta’u 70.

Ko e moto pe to’onga mo’ui ‘a Viena na’a ne muimui ki ai: ko ‘Ofa ‘oku fa’a tatali mo anga mokomoko, mo anga lelei he taimi kotoa. He ko ‘Ofa ‘oku ne malu’i ma’upe, falala ma’upe, ‘amanaki ma’upe pea tolonga ma’upe.

Ko ‘ene pekia ko eni na’a ne kei memipa ‘i he Siasi ‘o Dominion/Kingsland ‘i loto ‘Aokalani.

Na’e fakahoko ‘a hono malanga fakahekeheka ‘e he Faifekau Pule ‘o e Vāhenga Ngāue ‘Aokalani mo Manukau, Rev. Vaikoloa Kilikiti, ‘i he Manukau Memorial Gardens Chapel ‘i he 10am he ‘aho Falaite 18 ‘o Ma’asi, 2022.

Toka ā ‘i malu ‘o Sātai.