PRAISE THE LORD, OH MY SOUL, WITH ALL THAT IS WITHIN ME, PRAISE HIS HOLY NAME

O le agaga lena o le saunoaga fa’aaloalo a le Tausi Itu Malo a Hawkes Bay, le Susuga ia Rev Iakopo P Fa’afuata, na ia fa’aleo ina ai i le aso To’ana’i 22 o Iulai, 2023 le agaga fa’afetai tele i le Atua, ona o lona alofa ma lona agalelei lea ua mafai ai ona fa’amae’a ina ma le manuia lenei galuega tele ma le matagofie sa latou feagai ai.

O le afioga lava i le Sea ia Rev Paulo Ieli o le Sinoti Samoa,na ta’ita’iina le sauniga mo le fa’apaiaina o lenei hall lea ua fa’aigoaina o le “Wesley Community Centre Hasting”.Na fa’atumulia lea aso i le paia ma le mamalu o le au valaaulia mai le Sinoti Samoa fa’apea ma le Community.

O le Afioga i le Pulenu’u o Hasting, Her Worship the Mayor of Hasting To’osavili Sandra Haziehust na O’otina le Lipine ma ulufale ai loa le paia maualuga o le au valaaulia i le hall ma le amata ina o le Sauniga mo le Umusaina o le hall.

O le susuga i le Tausi Matagaluega mai Papakura ia Rev Faiva Alaelua na molimoli ina le taulaga fa’afetai i le Atua e ala i Talosaga.

O le susuga lava i le Tausi Itu Malo ia Rev Iakopo P Fa’afuata, na saunoa mo le Tala o le Galuega, O le afioga ia Tuatagaloa Tulou na saunoa mo le tala o le Tupe, ae o le Susuga i le tama’ita’i faifeau ia Rev Suivaaia Te’o -Tausi Matagaluega i Mangere Central, [Sea Malolo] na saunia le Upu fa’alaeiau mo lena aso.

Sa maua fo’i le avanoa e saunoa ai le Afioga i le Peresitene Aoao o le Ekalesia Metotisi i Aotearoa nei, le susuga ia Rev Peter Taylor, aua o ia o se tasi o malo fa’aaloalogia o lena aso fa’apea ma le Sui Peresitene o le Ekalesia le faletua ia Ms TeRito Peyroux-Semu.

Ae avea ia lenei avanoa e momoli atu ai le agaga fa’afetai tele i matua o le Itu Malo malosi a Hawkes Bay, lau susuga Iakopo ma le faletua ia Rosa Fa’afuata, fa’apea le paia maualuga o le matagaluega i ona tulaga fa’alupelupeina mo lenei galuega tele sa outou feagai ai.Malo le galulue. Malo le Onosa’i.Malo le loto tetele.

Tau ina alofa le Atua ma toe fa’atutumu atu lo outou tamaoaiga ua fa’aalu ona o le tautuaina o le Atua ma lana galuega paia, ae maise ai fo’i lo outou agalelei i matua o le Sinoti, fa’apea o matou tagata. Fa’afetai ! Fa’afetai ! Fa’afetai tele lava le alofa.

Congradulation !! and Well Done!!.

Soifua ma ia manuia,

Alofaaga mai ia Rev Tovia Aumua ma Fatuatia Tufuga