O le AsoSa 26th Iuni 2022, sa fa’ataunu’uina ai le Lotu lona lua a le Itumalo Manukau. Ma sa tapenaina ma ta’ita’iina lava lenei sauniga e le susuga i le Konevina o Autalavou ma lona Ofisa, o Peresitene o Autalavou a le Itumalo. Sa pei ose teu fugala’au matagofie i le va’ai le felanulanua’i o va’aiga i tapenaga o fa’aevagelia, aemaise o vi’iga ma fatuga malie sa pei o pesega a agelu o le lagi. Ma o i’ina na lagona ai i tino ma finagalo le ala ‘ese’ese o le pa’i mai o le feau a le Tala lelei i lena AsoSa fa’apitoa.

Na atagia lenei molimau ina ua fa’atomua le saunoaga fa’ai’u a le susuga i le Tausi Itumalo i upu a le perofeta o Isaia; ‘O tatou manatu, ua le o le finagalo lea o le Ali’i, o tatou ala fo’i, ua le o ala ia o le Ali’i’. Na afua ia lagona ona o se atugaluga, ina ua ia silasila i le polokalame o le aso, e na o le fa’afeiloa’i pu’upu’u lava a le Konevina, soso’o ai ma le tatalo pu’upu’u a le sui o le aiga Peresitene o Autalavou, ona amata loa lea o le polokalame. I lona finagalo, sa tatau lava ona iai se upu fa’amalosiau e ala mai lea i se lauga mai se tasi o le Aufaigaluega, peita’i sa leai.

Ma na fa’ato’a talitonu Toma ina ua va’ai ma molimauina le laulau sasa’a mai o le faiva o Pili, ina ua fa’asolo mai Autalavou, Oka! e leai se Autalavou na alo tamala i le tapenaina lelei o fa’aevagelia ma pesega na momoli mai ai le feau a le sini o le Tusi Faitauaso; “O LE FA’AILO O LE FA’AMOEMOE OLA MO LE AU-FA’ATUATUA’.- ‘A PREVIEW OF THE LIVING HOPE FOR THE FAITHFUL”.

O le agaga ua inu malie i fa’alumaga o taumafa fa’ale-agaga, na momoli ai le fa’amalo ma le fa’afetai tele i le Konevina ma le Komiti o tapenaga, aemaise o Autalavou ta’itasi o le Itumalo, ona fa’ai’u lea i le tatalo ina ua mati’eti’e le le vi’iga o le Atua, i le ala ‘ese’ese mai o lona finagalo mo lana fanau. Tumau ia i le Atua le vi’iga ma le fa’ane’etaga nei ma aso uma lava.

(Amene)