Tirohia ki uta, ki ngā maunga whakahī o te takiwā, ki a Maungawhau, ki a Owairaka, te matapuna o ngā awa e rere atu nei ki tai, ki te Waitematā.  Ko Waiateao, ko Waitītiko ngā manga e hono ana rā ki te moana. Nā reira e tuku mihi ana mātou ki ngā mana whenua, ki a Ngāti Whātua, ki a Te Waiohua , ki a Tainui waka i takea mai ai ngā ingoa wāhi me ngā kōrero tuku iho mō te rohe nei. 

Ka rere ngā kupu whakamihi ki ngā koroua, ki ngā kuia, ki ngā mātua i kaha tautoko i te whanaketanga o Ngā Uri O Ngā Iwi, koutou kua heke ki te karanga a Hinenuitepō, moe mai rā, takoto mai rā. Mei kore ake a Pā Achlee Fong, te kaihautū tuatahi o tō tātou waka mātauranga,  a Whaea Dianne Adams, te pouako i tapa ai i tō tātou whare Te Hononga O Ngā Wai, a Nana Ma nāna i whakaako, i poipoi ngā tamariki me ō rātou mātua i te roanga ake o ngā tau,  a Nana Pare, te poutokomanawa o te hapori, a Matua Paul McDade i whakapeto ngoi ki te whakatū i tō tātou akomanga.

Ko te pito mate ki te pito mate, ko te pito ora ki te pito ora. Tēnei ngā kaiako, ngā mātua me ngā tamariki o Ngā Uri O Ngā Iwi e mihi atu nei ki a koutou e mina ana ki te uru atu ki tō mātou kura o Te Rehu. Nau mai, haere mai, whakatata mai.

I ngā whārangi e whai ake nei, kua whārikihia ngā mātāpono, ngā mahi o te marautanga o tēnei o ngā kura Māori. Ko te tūmanako kei konei ngā whakautu ki ā koutou pātai, ā, ka whakapā mai koutou ki a mātou.