Ae pagā lava lea, e iai lava le manatu, e le o se tulaga e tau fa’ailoaina lenei lava tausaga ma ona taualumaga. Aua o se tausaga ese lava lenei i le malaga a le Sinoti Samoa mai lava i ona Ta’ita’i, o Tua’a ao-sinasina se’ia o’o lava i alo ma nai fanauiti. O le uiga o se lagona o se tausaga- ese lenei, aua fo’i e tele fuafuaga fa’ata’atitia ma polokalame a Aulotu, Matagaluega, o le Sinoti, ae fa’apea fo’i le tele o Komiti ma Mafutaga, vaega eseese atoa ai fo’i ma aiga ua le mafai ona fa’ataunuuina ma fa’atinoina i ala e masani ai, ona o tapu ma vavao o le Koviti 19 ma lona ma’ema’ea.

E ui lava, e le’i aofia-matagi ia Niu Sila atoa i le malosi o le pipisi o le fa’ama’i e pei ona iai level eseese, ae ua avea a’afiaga tele i Aukilani, o se vaega o le atunuu o lo’o to’atele ai a tatou Aulotu ma Matagaluega ae fa’apea fo’i o tatou tagata tapua’i, ma ua fa’asolo ina a’afia ai fo’i ma nisi vaega o lenei atunuu e pei ona iai fa’amaumauga mai le Matagaluega o le Soifua maloloina e pei fo’i ona fa’ailoa mai i lea aso ma lea aso.

O le TUIPUIPUI o lo’o fa’agasolo nei, e matua ioe lava le taofi ma le talitonuga, e tusa ai ma su’esu’ega ma sailiiliga ma ni taumafaiga a Saientisi, o Foma’i Su’esu’e ma i latou uma ua aumai iai le poto ma le atamai, o le AUALA lea ua tapena ma saunia e le Atua, e fa’apena ona auala ma momoli ma fa’ailoa mai ai lona ALOFA ma lana FA’AMALOLOGA i lana TAGATA soifua i lenei lalolagi, ua lailoa ma tigaina i le mata’utia o lenei Fa’ama’i o le Koviti 19 ma le Vairusi o le Delta Variant.

E oge upu lava le gagana e fa’amatala ai le mata’utia o le Atua na molimauina i lenei fa’amoemoe, ona ua le gata ia i latou na fa’apolokalameina atoa lenei Tuiga, ae o le to’atele o i latou fo’i na ofo atu lo latou lagolago i so’o se vaega o lenei fa’amoemoe. Mai le tolu la o aso o lenei Tuiga na fegai ai, e tusa ma le 2773 i latou na faia Tui i lea lava weekend e aofia ai ma le tele o alo ma fanau.

A’o le RIPOTI talu ai nei mai le Matagaluega o le Soifuamaloloina a le lalolagi WHO e pei ona taunuu mai le Aso Faraile na te’a i le weekend ua tuana’i atu; ua tusa ma le 251,788, 329 (Luaselau limsefulu male tasi miliona, fitu selau valusefulu ma le valu afe, toluselau luasefulu ma le iva tagata ua ‘a’afia i le Fa’ama’i. Ae 5,077 907 (Lima miliona, ma le fitusefulu ma le fitu afe, iva selau ma le fitu i latou ua maumau ma maliliu i latou mai lenei lava fa’ama’i talu ona amata mai.

O le fesili le pa’ia e, i le aufaitau ae maise o la tatou Sinoti Samoa; Fa’amata o le a se lagona e o’o ane ia te oe le tamā po’o oe le tinā ae a’afia se tasi o le fanau i lenei fa’ama’i ma ma’imau atu ai ma lona ola ona ua pisia mai ia te oe ona e le’i faia sou tuipuipui?

O le filifiliga a le tagata, o le aiā tatau lena a oe lava ia? Ae tau lava ina na’o na toe fa’amanatu atu, e leaga le toe iloa mulimuli ane le mea sa’o e tatau ona fai, ae ua tuai ua le aoga ua maliu se tasi. O lea tatou te ola ai lava ma na lagona e oo lava i le gata’aga o le ola i luga o le foga’ele’ele. O Iesu lava na ia fetalai: …ua ou sau ina ia outou maua le ola, ola atili ai lava.

Ae tau lava na ona toe fa’aolooloma’au atu ai i la tatou Sinoti, afai lava e iai se tasi e le’i faia sona tui ma tui o ou alo ma nai fanau, o le fa’atalosaga ma le loto maulalo, ia faia nei loa. Aua fai mai la le aposetolo o Paulo: Ua tatou iloa fo’i e galue le Atua i mea uma lava mo le lelei (manuia) fa’atasi ma i latou o e alalofa atu ia te ia (ma talia lona lava vala’au mai.)

Rev Tovia Aumua.