Ua momotu fa’afuase’i fo’i e Kapilielu mafutaga mafanafana a aiga ma e sa pele, ina ua fano ai lo latou soifua i lenei mala fa’alenatura, pagā le faigata o lenei mea. Talofa e, i nai aiga, taiane le fuaitau afe o tagata o lo’o tausaili pea, ae a meatotino ma pisinisi ua fa’atamaia. Tailo fo’i i le taimi na toai taunu’u ai le Koviti19 i le vevesi ai o le Malo, pe tutusa ma le taimi nei i le taufa’avasegaina e le Malo o ni auala ese’ese e tali ai manaoga o tagata lautele ona o lenei mala.

Aua e le’i mana’omia ni helicopter, e le’i aamiina le Navy po o le Army a Niu Sila mo le fa’atinoga o le galuega lavea’i i le taimi na aasa ai le Koviti19. Peta’i tasi lava ona afe mai Kapilielu, ae tuta i le gataifale o Hawesbay le sa o le Navy, tali mai le Army ua felelei-solo fo’i helicopter o fa’ailoga ia o le ogaoga o le fasi a Kapilielu i nisi o aai o Niu Sila.

Ua pei o se pomu okometi le pa-salalau (tulou) i totonu o nei aai o le atunu’u, faiga a Kapilielu. Lea la ua mou atu lona tino e pei o se lau laau mago e lelea i le matagi; pei o le mou o le puao. Peita’i ua tu’ufua ai maota ma laoa o le tele o aiga, ma ua suia fa’afuase’ia le matagofie o maota ina ua fa’atumulia i palapala ma otaota; tainane o ogalaau tetele na momoli mai e le ma’ema’e o Kapilielu. Ae a le motusia ai o le eletise, le maua ai ni feso’otaiga tainane o le fa’aleagaina o tele o auala e fesopoai ai le atunu’u. Fai mai se tasi molimau o se tama i totonu o Hawkensay “talu ona ou ola fa’atoa ou molimauina lea o se mea fa’apea. Ai e fa’apea le vaaiga i totonu o aai e tau ai taua tetele, ina ua fa’atamia ma fa’aleagaina meatotino a aiga ma pisinisi…”

A o le fesili ua tula’i mai, o a mai le loto i fale o le Sinoti Samoa? E iai ea se soifua ua fano i faiga a Kapilieu o le aiga Sinoti? E iai ea nisi o le Sinoti Samoa o tausaili talu ai le saua o Kapilielu?

Sinoti Samoa, o le tali e leai. Se’i vagana nai aiga sa a’afia ina ua lolovai o latou maota i Aukilani, Kisipone fa’apea ma Hastings. Peita’i o le aotelega o le aiga Sinoti Samoa, ua malagaloa ai le tu’ugamau ma le oti na sau Kapilielu.

E manatua ai le tauafiafi lea na sopoloa ai le malaga a le oti i faitoto’a uma o le aiga Sa-Eperu i totonu o Aikupito. E! leitioa pese le taule’ale’a Eperu na lagi fa’asolo ana fa’atuga e fa’apea: ‘Lo’u Agaga e, ia e faamanu atu i le Alii, o mea uma foi o I totonu ia te a’u, ia faamanuina ai lona Suafa paia. Lo’u Agaga e, ia e faamanu atu I le Alii, aua foi nei galo se mea e tasi o ana meaalofa’. Fonofa’apipi’i lea iai o le fa’atofalaiga a le Fatupese a le Ekalesia Metotisi ua fa’apea mai “E lelei! E lelei! Le Ali’i.” Ioe Sinoti Samoa, e lelei le Ali’i o lo’o tu pea i matagiolo.

Le pai’a e o le Sinoti Samoa; oute manatu o le pese fo’i lea e alagatatau ona tatou pepese ai i lenei piliota ina ua tuana’i atu le afea o Aotearoa e lenei mala, ae tatou lagiina lenei pese e fa’ailo ma ailao ai le alofa tausiva’atele o lo tatou Atua. Lea ua tatou tago i ‘ula, tepa i ‘ula; ua tatou futifuti manu’ula i le alofa ma le faamaoni o le Atua. Aua o lea ua malaga-loa Kapilielu, e ui sa lolovai nisi o aiga, a ua leai se aiga e fano le soifua. Ua se ‘i’a lava e moe i Salafai e pei o le matematega nai i Tumua, a o se Taleleomalie e pei o le igoa o le tama’ita’i mai le itulagi lea, le alofa fa’amalumalu o lo tatou Tapaausili.

A o se laolao lelei lenei e faatalofa ma faafeiloai atu i le paia o le tatou Sinoti Samoa. I le nofo a Tausi Itumalo ma o outou faletua, paia o le Aufaigaluega ma faletua, susuga i A’oa’o ma faletua, tama ma tina malolo manumalo, paia i aiga ma faleupolu o tofiga, o faletua ma tausi, o saoao ma le malosi o le tatou Sinoti Samoa, seia oo lava i alo ma fanau lalovaoa a lo tatou nuu. Malo le soifua maua ma le lagi e mama.

Fa’amalo le onosa’i, malo le galulue, faafetai le sailimalo i le Atua aua lana Talalelei i totonu o aulotu ma Matagaluega; lea ua savalia le tolu o masina o lenei tausaga fa’afetai taofiofii’umaea i le feau ma le galuega. Afai fo’i tatou toe tepa i tua i le mamao o le ala o lena tausaga; o lea e le’i pepe manu’a o le Koviti 19, a ua osofaia i tatou e Kapilielu. Peita’i e ofo lava le loto, i le maualuga, loloto, ma le lautele o le alofa fa’amatuamoepo o lo tatou Atua. Fa’aleo ai le agaga fa’amalo ma le fa’afetai tele i le aufaigaluega, tainane le loaloa o le Sinoti Samoa i lo outou soifua galulue ma le taupati i le tatou feau ma le galuega, tainae o le faiva faitatalo i aso uma.

Tatou tatalo pea mo se manuia o lenei atunu’u ua outou papaao ma tatou aumau ai, ia malutia ma saogalemu i le alofa fa’amatua o le Atua. Ia iai pea fo’i le agalelei o le Atua i so’o se itulagi o lenei atunu’u o lo’o matua mafatia ona o faiga leaga a Kapilielu; aemaise o nai aiga ua motusia le mafutaga ma e sa pele ina ua fano ai le soifua.

Ia sagai ane ‘ai o le tai i le tatou aiga Sinoti Samoa. Ia laulausa’a le fa’asoa mai a le Atua e ala i ana fa’amanuiaga mo so’o se aiga o le tatou Sinoti Samoa, mai lava i le Laumua seia o’o i Manukau ma Aukilani. O ai fo’i se aiga o finau pea ma lu’itau ma ni fa’afitauli ogaoga o le soifuaga nei, o le tatalo a la outou auauna ia lotolotoi i totonuaglemu o outou maota ma laoa ma aiga le filemu ma le agalelei le mavae o lo tatou Atua. Taumamao mala ma puapuga a ia folau ai i lagima i se vaega o totoe o lenei tausaga; aua lava ne’i oso se peau vale.

Avea ia ulua’i upu o le pese 115 e fai ma a tatou tatalo i lenei vaega o le tausaga ma tatou fa’apea atu i le Atua:

Iesu e, tautai le sa o le Sinoti Samoa

I le vasa faigata

Pe a oso le peau

I le galu ma le au

Oe le tautai e lelei

Pule i le vasa nei. – Amene

Cartoon