E na yaca ni Kalou na Tamada, na Luvena kei na Yalotabu, sa cavuti tiko yani kina e ke na Vakabula ki na loma ni Wasewase ko Viti kei Rotuma e Niusiladi.

Ni sa Bula Vinaka ka nuitaki ni daumaka tiko na Bula vei kemuni kece sara e na loma ni dui vei vuvale kei nai vavakoso ni noda vei Tabacakacaka.

Noda i vaqa vaka yalo e tauri ga mai e na noda lesoni e na Lectionary.

E raici talega kina e na vula vou oqo na Veibuli (Creation).

I kau

Na bula ni cola Kauveilatai e vola ko Luke e bula ni veiqaravi me da rawa kina ni wili me da Tisaipeli nei Jisu. E rawa ni da muri Jisu tiko, ia e na rawa talega ni da sega tiko ni wili me da nona Tisaipeli. E da kila na tamata Vakabauta ni da tamata kacivi, ia noda digitaki me da Tisaipeli e na vakatau mai na noda colota tiko noda Kauveilatai. Ni ra lewe vuqa e ra sa kacivi, ka lewe lailai e ra sa digitaki (Maciu 22:14).

Na Bula ni tamata sa vakila ni kacivi, se tamata kacivi sa vaka io ka toso e na talai rawarawa. Na Turaga, Marama digitaki e vaka i vakarau-taka nona bula ni muri Jisu e na nona Lotu. E bulataka ka vakaitavi-taki koya e na cakacaka ni Lotu savasava kei na dina. E na dau basika tiko e na nona vanua kece ni veiqaravi nai rairai ni bula nei Jisu ka solia kina na bula vei ira tale e so.

Tolu na Vakasama leleka.

Sega ni rawa ni da muri wale tu ga e na i lakolako qo ....Kevaka e dua sa via muri au, me kakua ni muria na lomana, ia me colata ga nona Kauveilatai ka muri au (Maciu 16:24).

Sega ni rawarawa na bula ni cola Kauveilatai, ka ra na colata vakavinaka ga ko ira e ra vakarautaki ira vakavinaka. E ra Turaga ka Marama kaukauwa, dau vosota vaka dede, yalo malumalumu, talai rawarawa ka dau vaka rorogo. Oqori nai solisoli loloma ni Kalou vei ira na Tisaipeli e ra colata nodra kauveilatai ka muri Jisu.

E sega na vei-murimuri se vaka muri i tuvatuva wale tu ga e na loma ni Lotu. E tiko nai tavi me qaravi ka da nuitaki kina na lewe ni Siga Dina. Sega ni da waraka e dua na gauna me da qai vaka i tavi kina e na loma ni Lotu. De na sega ni yaco mai na gauna o'ya. Me da kua talega ni ciqoma vaka rawarawa na veika vovou nikua de vagolei keda cala e na noda i lakolako.

Me da segata me tubu tiko noda bula vaka yalo me rawa ni soli kina vei keda na kaukauwa me da colata tikoga kina noda kauveilatai ka sega ni vakatauca i ra. Noda Lotu me bulataki vaka yalo ka vaka i dina me rawa kina noda wiliki me da Tisaipeli nei Jisu. Na tamata vakabauta dina na tamata e rai tikoga ki liu. E na dau raica tiko nai cavacava ni lakolako qo, ka cakacaka-taka me yacova.

Sa bibi na vakatulewa ni muri Jisu. Sega ni ka me dua e vakasaurara-taki keda kina, se mai vakalomavinaka-taki keda walega kina.

Na bula ni muri Jisu e bula ni kila na kena cakacaka-taki kei na kena i cavacava. Na muri Jisu me dua na ka e tiko kena i balebale (Reason) vei keda. Noda Lotu e rawa ni cava vaka vinaka, ka rawa talega ni sega ni vakacavari vaka vinaka .... t27 Ia ko koya talega e na sega ni colata nona Kauveilatai ka muri au sa sega ni rawa me noqu Tisaipeli.

Ni lako siviti na veimama ni yabaki ka yacovi mai nai ka walu ni Vula e na mua ni yabaki qo, 2022, sa na dau tekivu vakilai mai na wawale se malumalumu nai lakolako ni cola Kauveilatai. Na taro me da na tarogi keda kina, Se sa vakacava tiko na cakacaka kei na bulataki ni noda Lotu ? Se colati tiko vakavinaka na Kauveilatai se sa vakatauci ki ra ka da sa mai vakamumuri wale tu ga yani ?

Vakabibi taka ko Jisu e na noda lesoni noda lomana na tamada, tinada, watida kei na luveda me lailai mai na noda lomani koya ka muri koya. Sega ni tukuni me sa biu na vuvale. Na yaloda ga me vakalevu-taki kina na noda lomani Jisu e na noda Lotu. Me da lomana na Kalou e na Lomada taucoko, na yaloda taucoko kei na noda nanuma taucoko (Maciu 22:37). Me soli vakavinaka na Vakasama, na Yalo kei na Kaukauwa ki na noda veiqaravi. Oqori me na rawa ni basika kina na Yalo ni Kalou e na loma ni Vuvale, Lotu, Vanua kei na Matanitu.

Na colati ni Kauveilatai vei keda nai Taukei mai Viti e sema talega kina na colati kei na maroroi ni Vanua. E na levu ni Lotu vou, i tovo kei na i vakarau ni bula vovou sa basika e vuravura nikua, na Wasewase ko Viti kei Rotuma e NZ me maroroya na i tovo kei na i vakarau ni noda Lotu e da a susugi kina mai vei ira noda Qase mai Viti.

Tabacaka ko Jesirieli e yavutaki e na nodra mai vaka toka yaca taka na Turaga Talatala Qase Vakacegu, Peni Tikoinaka e na 2017. Me maroroi e Jesirieli, ka kua ni soli vakarawarawa e na vuku i Jiova na noda i tovo kei na i vakarau ni qaravi Kalou.

1Tui 21:3 A sa kaya vei Eapi ko Nepoci, " Me kakua sara vei au e na vuku i Jiova me solia vei iko na nodra vota vota na noqu qase". Dina ga ni na dodonu me veisau e so na ka me sotava na vanua kei na gauna vou qo, me da maroroya ka kakua ga ni vakayalia vakadua noda i tovo kei na noda i vakarau e da kilai tani kina.

E da na sega ni lako duadua e nai lakolako qo. E na muri keda ka tiko vata kei keda ko Jisu e na vei gauna kece. Veitalai ko Jisu vei ira nona Tisaipeli ka kaya, " .... Mo dou kila, au sa tiko vata kei kemudou e na vei siga kecega, ka yacova nai vakataotioti kei vuravura (Maciu 28:19).

Na vei veisau ni draki ni bula sa sotava ko Vuravura nikua e na rawa me vakasesei keda ka da nanuma ni sa yali ko Jisu e na noda i lakolako. Na vei i soqosoqo e na taudaku ni Lotu (Community) ka vure mai na Secular Society me da qarauna e na noda bula veimaliwai tiko kei ira.

E levu kina na vaka mata vulo ka rawa ni ra vakayagataka na Lotu me ra rawata kina nodra i le. Na vosa nei Jisu vei ira na Farisi (Marika 7:6) Sa tukuni kemudou vaka vinaka e liu ko Aisea, "koi kemudou na dau ni vei vakaisini me vaka sa volai. Ko ira na tamata oqo e ra sa vakarokorokotaki au e na tebe ni gusudra, ia na yalodra sa yawa tani vei au". Na nodra i vadi e na rawa me da vakatauca kina i ra noda kauveilatai ka da yali vata yani e na Vuravura butobuto e ra tiko mai kina.

Vei ira na Tisaipeli, veitalia na dredre e na dau sotavi, na bolebole kei na malumalumu e nai lakolako. Na Yalotabu e na vei tomani ka i vurevure tiko ni kaukauwa kei na vakacegu. E na dau sotavi keda ka na laki tavaki keda talega ni cava noda i lakolako qo. Jeremaia 17:10 Ko i au ko Jiova ka'u sa dau dikeva na loma ni tamata, ka'u vakatovolea na kena ivi, me'u na solia ki na tamata yadua me vaka na nona i valavala, me vaka na vua ni nona cakacaka.

Tinitini.

Na cola Kauveilatai e na vakatau tikoga vei keda na kena bibi kei na kena mamada. Noda vakatulewa vinaka ka vakabauta ni lako vata tiko kei keda ko Jisu e na mamada ka da kune vakacegu tiko kina e na noda i lakolako ni Lotu.

Maciu 11:28-30 Dou lako mai vei au ko i kemudou vaka yadua sa oca ka colata nai colacola bibi, ia au na vakacegui kemudou.

Vakataqara vei kemudou na noqu i vua ka vuli vei au niu sa yalo malua ka yalo malumalumu. Dou na na kunea kina na vakacegu ni yalomudou. Ni sa rawarawa na noqu i vua ka mamada na noqu i colacola.

Na Bula vaka Tisaipeli e sega ni lako vaka veitalia se sega tu ni kila na kena i cavacava. E nodra na tamata soli bula ka kila tiko na vanua e lakova, i tavi kei na gauna me qarava kina.

Vei keda e na loma ni Wasewase ko Viti kei Rotuma e NZ, na bula ni cola Kauveilatai me toso tikoga ka kua ni yaco koso de da na yali koso mai kina e na mata ni Kalou.

Me ceguva ka Vakalougata-taki keda vata na Kalou e na nona i tukutuku vei keda e na Vulavou qo.

Emeni.

CBM